लोकप्रिय कमेडी शो ‘कमेडी दरबार’का जज विजय बरालले शो छाड्ने भएका छन्। समय व्यवस्थापन गर्न कठिन भएकाले उनले शो छोड्न लागेको बताएका छन्। विजयले ‘कमेडी दरबार’का लागि २६ भागसम्मको सम्झौता गरेका थिए, जसअनुसार अब चार भागको छायांकन पूरा गरेपछि उनी शोबाट बाहिरिने छन्।
हालसम्म शोका २२ भाग प्रसारण भइसकेका छन्। उनले तीन भागको छायांकन पूरा गरेपछि फिल्मको काममा व्यस्त हुनेछन्।
विजय बराललाई मुख्य भूमिकामा लिएर नयाँ फिल्म ‘जनै हराएको बाहुन’ बन्न लागेको छ। सुरेन्द्र पौडेलको निर्देशनमा बन्ने यस फिल्ममा ‘बरिष्ठ बलराम’ समेत अभिनय गर्नेछन्। विजयले केही समयअघि मात्र यो फिल्मका लागि साइन गरेका हुन्। साथै, उनले ‘कबड्डी ५’ र ‘जारी-२’ लगायतका फिल्ममा पनि संलग्न हुनुपर्ने भएकाले समय मिलाउन गाह्रो भएको बताइएको छ।
‘जनै हराएको बाहुन’ हिमाल न्यौपानेको निर्देशनमा निर्माण हुन लागेको हो। यस फिल्मका एसोसिएट निर्देशक प्रेम गीत ३ का अभिनेता मनिष राउत हुन्। फिल्मको कथा, पटकथा र संवाद भानुभक्त ढकालले तयार गरेका छन्।
पेपरक्लिप प्रालिले निर्माण गर्न लागेको ‘जनै हराएको बाहुन’ नवीन गुरुङले खिच्नेछन् भने सिआर बस्नेत, कमल न्यौपाने, आरके मानन्धर, विमल न्यौपाने, फिलिप डिसी र निशान्त श्रेष्ठले संयुक्त रूपमा लगानी गर्दै छन्। विजय बरालको व्यस्तताको कारणले उनी ‘कमेडी दरबार’को सेट छोड्ने निर्णयमा पुगेका हुन्।
विजय बरालले ‘कमेडी दरबार’ छोड्ने चर्चा चलिरहँदा शोका निर्देशक विक्की अग्रवालले भने उनलाई फकाउने प्रयास गरिरहेका छन्। उनले भने, “विजय सरले छाड्छु भन्नु भएको छ, तर हामीले मिलेसम्म मिलाउनुहोस् भनेका छौं। उहाँलाई फकाउने प्रयास गरिरहेका छौं।”
