चलचित्र संघ र निर्माता संघबीच आज नेपाली फिल्म हलहरुमा चलुन्जेल ५० प्रतिशत शेयर पाउने सहमति भएको छ ।
कात्तिक २४ गतेबाट प्रदर्शन भएको फिल्म ‘दिमाग खराब’का निर्देशक निश्चल बस्नेत र निर्माता रौनक विक्रम कडेलले फिल्म हलमा चलुन्जेल ५० प्रतिशत सेयर पाउनुपर्ने भन्दै उठाएको मागमा प्रदर्शक र वितरकको संस्था नेपाल चलचित्र संघ सहमत भएको हो ।
सम्झौताअनुसार गएको कात्तिक २४ गतेदेखि प्रदर्शनमा आएका नेपाली फिल्मले हलहरुमा चलुन्जेल ५० प्रतिशत शेयर पाउनेछन् । यसले नेपाली निर्मातालाई ठूलो राहत हुने देखिएको छ ।
यसअघि नेपाली फिल्मका निर्माताले तेस्रो हप्ताबाट ३५ प्रतिशत मात्रै शेयर पाउने गरेका थिए । गएको बुधबार र बिहीबार दुई दिनसम्म चलेको वार्तापछि हल सञ्चालकहरु आफूहरुको मागमा सहमत हुन तयार भएको ‘दिमाग खराब’का निर्माता रौनक विक्रम कँडेलले जानकारी दिए ।
शेयर बाँडफाँड ५०-५० प्रतिशतको अलवा चलचित्र संघ र निर्मातासँगबीच अन्य सहमति पनि भएको छ । निर्माता कँडेलका अनुसार अबदेखि हलमा लाग्नुअघि नेपाली फिल्मको तीन मिनेटसम्मको ट्रेलर १५ दिनसम्म हलले सित्तैमा बजाइदिनेछ । यसअघि डेढ मिनेटको ट्रेलर मात्रै हलले बजाइदिने गरेको थियो । साथै हलहरुमा पोस्टर लगाउन निर्माताहरुले हल सञ्चालकलाई पैसा तिर्नुपर्ने अवस्था थियो । अबदेखि पोस्टर टाँस्न पनि पैसा तिर्नु नपर्ने भएको छ ।
निर्माता कँडेलले भने, ‘दिमाग खराबले उठाएको मुद्दालाई उहाँहरुले अहिले सम्बोधन गर्नुभएको छ । यसले सिंगो नेपाली फिल्मलाई नै फाइदा पुर्याउने छ । कम्तीमा हामी निर्माताहरुलाई ठूलो रहत महसुस भएको छ ।’
गएको कात्तिक २९ गते ‘दिमाग खराब’ टीमले हलहरुमा शो बाँडफाँडमा अन्याय भएको भन्दै आफ्नो फिल्म हलबाट उठाउने चेतावनी दिएका थिए । आफूहरुले तेस्रो हप्ता पनि ५०-५० प्रतिशत शेयर पाउनुपर्ने, विदेशी फिल्म बराबर शो पाउनुपर्ने । यदि नपाएको खण्डमा फिल्मलाई हलबाट निकालेर प्रदर्शनका लागि वैकल्पिक माध्यम खोज्न बाध्य हुने बतार्एका थिए ।
