चलचित्र ‘गुञ्जन’को ट्रेलर सार्वजनिक गरिएको छ ।
एएच इन्टरटेन्मेन्ट प्रा.लि र हिरा कृष्ण शाही फिल्मस्को प्रस्तुतिमा तयार भएको चलचित्र ‘गुञ्जन’को दोश्रो ट्रेलर आज सार्वजनिक गरिएको हो ।
पौषको २९ गतेबाट रिलिज हुन लागेको चलचित्रको पहिलो ट्रेलरले अपेक्षित चर्चा नपाएपछि बिहीवार राजधानीमा एक कार्यक्रमकाबीच दोश्रो ट्रेलर सार्वजनिक गरिएको हो ।
त्रिकोणात्मक प्रेमकथा भन्ने चलचित्रमा सारा सिर्पाली, प्रितम राज सेन्चुरी, कविर खड्का, सरोज खनाल, हिउवाला गौतम लगायतका कलाकारको अभिनय रहेको छ।
यो चलचित्रको ट्रेलरमा साराका लागि कविर र प्रितमबिचको युद्धको कथा देखाइएको छ । चलचित्रलाई अष्टमान महर्जनले निर्देशन गरेका हुन् ।
चलचित्रमा हिरा कृष्ण शाही र सुनिता शाहीको लगानी छ । महेश दवाडीको कथामा तयार भएको चलचित्रमा राजेश श्रेष्ठको छायांकन, कविराज गहतराजको कोरियोग्राफी, विपिन मल्लको सम्पादन छ ।
यो चलचित्रको ट्रेलरलाई प्रेममय बनाइएको छ । एक यूवतीले आफ्नो जीवनमा भोग्ने प्रेमको आरोह अवरोहलाई चलचित्रमा प्रस्तुत गरिएको वुझ्न सकिन्छ । निर्देशक महर्जनले चलचित्रलाई उत्कृष्ट बनाउने कोशिश गरेको भन्दै दर्शकलाई मनपर्ने विश्वास व्यक्त गरे ।
ट्रेलर सार्वजनिक कार्यक्रममा यो चलचित्रका निर्माता हिराकृष्ण शाहीले कथावस्तु मन परेन भने दर्शकको टिकटको पैसा फिर्ता गर्ने घोषणा गरेका छन्।
उनले भने–‘यदि, चलचित्र मन परेन भने दर्शकले मेरो नम्बरमा फोन गर्न सक्नुहुन्छ । म मन नपर्नुको केही कारण पक्कै पनि सोध्नेछु । त्यसपछि दर्शकले काटेको टिकटको सबै पैसा फिर्ता गर्नेछु ।’
