विगत लामो समयदेखि अष्ट्रेलियामा बस्दै आएकी सलिना बस्नेत अभिनयमा आउने भएकी छन् । उनले डकुड्रामा सिरिज ‘हामी छौं’बाट अभिनयमा डेब्यू गर्न लागेकी हुन् । बुधबार सार्वजनिक डकुड्रामाको पोस्टर हेर्दा ग्रामीण क्षेत्रको कथालाई उठाउन लागिएको बुझिन्छ ।
सलोन सलिना फिल्म्सको प्रस्तुतिमा निर्माण हुन लागेको यो ड्रामामा सलिनासँगै आर्यन पौडेलको पनि अभिनय रहनेछ । यो ड्रामाका निर्मातामा आर्यन पनि छन्। सलिना स्वयंको निर्माण रहने यो ड्रामाका लागि उनी बैशाखमा नेपाल आउने छिन् ।
यो डकुड्रामाका लागि निर्देशक भने निश्चित भैसकेका छैनन् । सलिनाका अनुसार, नाम चलेकै निर्देशक लिने तयारी भैरहेको छ । सात एपिसोड रहने डकुड्रामाको हरेक एपिसोडमा अलग-अलग निर्देशकले निर्देशन गर्नेछन् ।
ड्रामामा शम्भुजित बाँस्कोटा संगीत रहनेछ भने आनन्द अधिकारीको शब्द रचना छ । सलिना अष्ट्रेलियाको सिड्नीमा र आर्यन ब्रीज्बेनमा बस्ने गरेका छन् । उनीहरु दुवै अष्ट्रेलियाको सोसल मिडियामा चर्चित मानिन्छन् । यो ड्रामा ५० लाख बजेटमा निर्माण गरिनेछ।
