प्रदीप भट्टराईको लेखन तथा निर्देशन रहेको फिल्म ‘महाजात्रा’ आजबाट दोस्रो सातामा प्रवेश गरेको छ । फिल्मले पहिलो साता सुखद कमाई गर्दै दोस्रो सातामा प्रवेश गरेको हो।
दोश्रो सातासम्म आइपुग्दा निर्माण युनिटले पहिलो साताको कमाइ सार्वजनिक गरेको छ। यो फिल्मले रिलिजको पहिलो दिन १ करोड २३ लाख, दोस्रो दिन १ करोड ८३ लाख र तेस्रो दिन १ करोड २० लाखको ग्रस कलेक्शन गरेको थियो । ३ दिनमा फिल्मको ग्रस कलेक्शन ४ करोड २६ लाख पुगेको थियो । यसपछिका बाँकी दिनमा यो फिल्मले १ करोड ९८ लाखको ग्रस कलेक्शन गरेको थियो । फिल्मले एक सातामा ६ करोड २४ लाखको ब्यापार गरेको हो।
विश्व बजार, डिजिटल मार्केटबाट पहिले नै लगानी उठाइसकेको फिल्म सुपरहिट भइसकेको छ । अब, फिल्मले बक्स अफिसमा ब्लकबस्टर व्यापार गर्छ या गर्दैन, त्यसका लागि भने केही साता पर्खिनुपर्ने हुन्छ ।
यो फिल्मका लगानिकर्ता म्याक्स दीपेश खत्री र यज्ञश्वर पौडेल हुन् भने यो चलचित्रमा हरिवंश आचार्य, विपिन कार्की, रविन्द्र सिंह बानियाँ, वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्य देव, सुमन कार्की, शिशिर वाङ्देल, गौमाया गुरुङ, अरविन खड्का लगायतको अभिनय छ । यो चलचित्रका कार्यकारी निर्माता रबिन्द्र सिंह बानियाँ हुन्।
