अभिनेता प्रदिप खड्का नयाँ चलचित्र ‘कामिनो’ मा अनुबन्धित भएका छन् ।
स्पेनिस भाषामा कामिनोको अर्थ बाटो हो । दीपक ओलीको निर्देशनमा निर्माण हुने ‘कामिनो’ को बुधवार सामाजिक सञ्जालमार्फत प्रदीपको नाम उल्लेख भएको थिम पोस्टर नेपाली र अङ्ग्रेजी भाषामा सार्वजनिक गरिएको छ ।
पूर्ण लामा कृएटिभ डिरेक्टर र सुनिल विष्ट गौली कार्यकारी निर्माता रहेको चलचित्रको स्क्रिप्ट महेश दवाडीले लेखेका हुन् । नेपाली, हिन्दी, अङ्ग्रेजी र स्पेनिस भाषामा बन्ने यो चलचित्रलाई एक्सिस नेपाल फिल्म्सले निर्माण गर्ने भएको हो ।
अभिनेता प्रदिपलाई आफ्नो चलचित्रमा अभिनय गराउन निर्माता, निर्देशकहरू लालायित हुने गरे तापनि ‘प्रेम गीत–३’ पछि उनले कुनै चलचित्र साइन गरेका थिएनन् । स्क्रिप्ट,टिम र क्यान भास मन परेकाले प्रदिप यो चलचित्र गर्न राजी भएको बताइएको छ । प्रदिप र ‘कामिनो’ निर्माण पक्षबिच गत शुक्रवार औपचारिक सम्झौता भएको थियो ।
नेपाल र ल्याटिन अमेरिकाका विविध स्थानमा छायांकन हुने चलचित्र प्रेम, रोमान्स र सस्पेन्स हुने निर्देशक ओलीले बताएका छन् । चैत्र तेस्रो साताबाट छायांकन गर्ने लक्ष्य राखिएको चलचित्र सौरभ लामाले खिच्ने छन् ।
चलचित्रमा एसडि योगी र अलिस कार्कीको संगीत, सम्राट बस्नेतको द्वन्द्व निर्देशन र दिनेश प्रकाश महराको प्रोडक्शन डिजाइन रहेको छ । दिनेशबहादुर राउत मुख्य सहायक निर्देशक रहेको चलचित्रको सहायक निर्देशकमा अमृतमान ओली छन् । स्क्रिप्ट लेखनमा दवाडीलाई कुञ्जन भट्टराईले सघाएका छन् ।
चलचित्रको हिरोइनलगायत अन्य कलाकार तथा प्राविधिक चयन कार्य छिट्टै समापन गर्ने तयारी निर्माण पक्षको छ ।
