अभिनेता प्रदीप खड्काको मुख्य भूमिका रहेको फिल्म ‘एक्टर: टेक वान’को दोस्रो पोस्टर सार्वजनिक भएको छ । हाल पोस्ट प्रोडक्सनमा रहेको फिल्मको निर्माणपक्षले बिहिबार थिम पोस्टर सार्वजनिक गरेको हो ।
कात्तिक १५ गते रिलिज हुने फिल्मको सार्वजनिक पोस्टरमा फिल्मका मुख्य कलाकार प्रदीप खड्कालाई देख्न सकिन्छ । लामो कपालमा रहेका उनको अनुहारभरी घाउचोट लागेको आलो रगत छ । यसले उनी कसैको आक्रमणमा परेको प्रष्ट बुझिन्छ ।
कालो टिसर्टमा रहेका उनी कुनै होटेल वा पवमा रहेका हुन् कि भन्ने पृष्ठभूमी हेरेर अनुमान लगाउन सकिन्छ । तर प्रष्ट भने छैन । यद्यपि, कालो टिसर्ट, मुख्य पात्रमाथिको आक्रमण र पृष्ठभूमीको कलरले कतै फिल्मले स्याड स्टोरी त भनेको छैन भन्ने अनुमान लगाउन सकिन्छ । तर निर्माणपक्षले स्टोरी खुलाएको छैन ।
यो पोस्टर डिजाइन ट्राइडेन कन्सेप्टका तर्फबाट रोयल भिमसेनले गरेका हुन् ।
राजन भुसालको निर्देशन रहेको फिल्म ‘एक्टर’मा प्रदीपसँगै डेव्यु अभिनेत्री दिव्या रायमाझी, आना शर्मा, राजवल्लभ कोइराला, दिव्य देव, सुशील सिटौलालगायत कलाकारको अभिनय रहनेछ । अभिनेता खड्काले पहिलो पटक फिल्मी पर्दामा आना र दिव्यासँग सहकार्य गर्न लागेका हुन् ।
अदृत फिल्मस् र मोती फिल्मस्को प्रस्तुति रहेको फिल्ममा थमन कुमारी भण्डारी निर्माता हुन् । क्रेयटिभ प्रोडुसर मोती कार्की रहेको फिल्मको लाइन प्रोड्युसरमा तोरन क्षेत्री हुन् ।
फिल्मको कथा आकाश बराल र राजन स्वयंले लेखेका छन् । फिल्मलाई नरेन्द्र मैनालीले खिचेका हुन् ।
फिल्ममा रोयल भिमसेन र सुजन श्रेष्ठको पब्लिसिटी तथा पोस्टर डिजाइन, शिशिर खाती र किरण थापा कोरियोग्राफी, अष्टम महर्जनको द्वन्द्व कृष्णमान तामाङको आर्ट डिरेक्सन, हर्कुलस बस्नेत, रोहित शाक्य र एलिस कार्कीको संगीत रहेको छ ।
यो फिल्मको वितरणको जिम्मा एप्पल इन्टरटेन्टमेन्ट र डिसिएनले लिएको छ ।
