चाडपर्वको उत्साहले भरिएका दसैँ, तिहार, र छठ जस्ता चाडपर्वहरू सकिएसँगै बहुप्रतीक्षित नेपाली चलचित्र ‘बलिदान’ को छायाङ्कनले अन्तिम चरणमा प्रवेश गरेको छ। शुक्रबारदेखि मोरङको कानेपोखरीमा निर्माण गरिएको विशेष सेटमा बाँकी दृश्यहरूको छायाङ्कन सुरु भएको छ। निर्देशक सन्तोष सेनका अनुसार चाडपर्वका कारण रोकिएको काम अब तीव्र गतिमा अघि बढ्नेछ।
गत भदौमा सुरु भएको यस चलचित्रको छायाङ्कन अन्तिम तालिकामा प्रवेश गरेको छ, जसका लागि झन्डै ४५ दिन छुट्याइएको छ। प्रमुख कलाकारहरू समीर भट्ट, सौगात मल्ल, अर्पण थापा, दिव्यदेव, र ऋचा शर्मा मोरङ पुगेका छन्।
निर्देशक सेनले छायाङ्कन पूरा भएको भोलिपल्टै चलचित्रको टिजर सार्वजनिक गर्दै रिलिज मिति घोषणा गरिने जानकारी दिएका छन्। उनले भने, “रिलिज मिति तय भइसकेको छ, तर यसको औपचारिक घोषणा टिजरबाट हुनेछ।”
एक्सन प्रधान रहेको ‘बलिदान’ मा दक्षिण भारतीय चर्चित एक्सन निर्देशक स्टन्डर सामले करिब ३० जनाको टोलीको नेतृत्व गर्दै अत्याधुनिक प्रविधिबाट एक्सन दृश्य तयार गरिरहेका छन्। सामले ‘हाथी मेरे साथी’ र चियान विक्रम अभिनीत ‘थङ्गलम’ जस्ता चर्चित चलचित्रमा पनि काम गरिसकेका छन्।
चलचित्रको अन्तिम छायाङ्कनका लागि महेश पौडेलले छायाकारको जिम्मेवारी सम्हालेका छन्। यसअघि सञ्जय लामा यो भूमिकामा थिए, तर अर्को चलचित्रको काममा व्यस्त भएका कारण पौडेलले यो जिम्मेवारी लिएका हुन्। पौडेलले यसअघि ‘१२ गाउँ’ जस्ता चलचित्रमा काम गरिसकेका छन्।
चलचित्रको कथावस्तु नेपालको सार्वभौम भूमिमा भइरहेका शोषण र अन्यायविरुद्धको संघर्षमा आधारित छ। समाजका तथाकथित नाइकेहरूको वर्चस्व विरुद्धको कथावस्तुले दर्शकको ध्यान खिच्ने अपेक्षा गरिएको छ।
‘आसुसेन फिल्म्स प्रा.ली.’ को प्रस्तुति रहेको यो चलचित्र पवन ब्राडफोर्ड बिस्टले निर्माण गरेका हुन् भने प्रेम पुरी सह-निर्माताका रूपमा रहेका छन्। सामाजिक यथार्थ चित्रण, भव्य दृश्य र अत्याधुनिक प्रविधिको प्रयोगले चलचित्रले सिनेप्रेमीहरूलाई आकर्षित गर्ने विश्वास लिइएको छ।
‘बलिदान’ को उत्कृष्ट टिम र प्रविधिको मेलले यसलाई नेपाली चलचित्र उद्योगको नयाँ उचाइमा पुर्याउने अपेक्षा गरिएको छ।
