अभिनेता विपिन कार्की र अभिनेत्री मिरुना मगरको शीर्ष भूमिका रहेको चलचित्र ‘ऊनको स्वीटर’को पोस्टर सार्वजनिकसँगै प्रदर्शन मिति घोषणा गरिएको छ ।
सोमबार निर्माण पक्षले आधिकारिक पोस्टर सार्वजनिक गर्दै ‘ऊनको स्वीटर’ आगामी २०८२ साल वैशाख २६ गते देशभर रिलिज हुने जानकारी गराएको छ ।
ग्रामीण कथा र सांस्कृतिक झल्को दिने पोस्टरमा विपिन कार्कीले डोको र डायरी समातेका छन् भने मिरुना मगर मन्द मुस्कानसहित प्रस्तुत भएकी छिन् । आर्टमाण्डू प्रा.लिले निर्माण गरेको चलचित्रको छायांकन पाँचथर र नेपाल-भारत सिमानाको फालेलुङ क्षेत्रमा गरिएको हो ।
नवीन चौहानले निर्देशन गरेको चलचित्रमा विपिन र मिरुनासँगै सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, भावना खपाङ्गी मगरलगायतको अभिनय रहेको छ।
निर्देशक चौहानको यो पहिलो फिचर फिल्म हो । उनले यसअघि ‘घुमी घुमी,’ ‘देखेर तिमीलाई – तीनपाते,’ ‘फूलथुङ्गे रानी,’ र ‘चन्द्रमा’ जस्ता म्युजिकल फिल्महरू निर्देशन गरेका थिए ।
चलचित्रमा सुजन चापागाईँ र झुमा लिम्बुले संगीत दिएका छन्, भने ब्याकग्राउन्ड म्युजिक कोबिद बज्रले तयार गरेका छन् ।
चलचित्रको एसोसियट निर्माता केन्द्र मोशन पिक्चर्स रहेको छन् भने कार्यकारी निर्मातामा सागर बुढाथोकी र मिलन खत्री छन् ।
‘ऊनको स्वीटर’ ले ग्रामीण जीवनशैली र मौलिक सांस्कृतिक कथालाई पर्दामा प्रस्तुत गर्ने लक्ष्य लिएको छ । चलचित्रको वितरण काफिया फिल्म्स र कुबेर सिने डिस्ट्रीब्युसनले गर्नेछन् ।
