नायक सुशिल श्रेष्ठको बलियो पुनरागमन गराउने विश्वास गरिएको चलचित्र ‘आउटल: दफा २१९’ को नयाँ पोस्टर सार्वजनिक गरिएसँगै प्रदर्शन मिति घोषणा गरिएको छ ।
असोज ३ गतेबाट पोस्टपोन्ड भएको यो चलचित्र अब फागु पूर्णिमाको अवसर पारेर फागुन २९ गतेदेखि नेपालभर प्रदर्शन हुने पक्का भएको हो ।
सार्वजनिक भएको पोस्टरमा सुशिलको दमदार लुक्स देख्न सकिन्छ । हातमा हतियार बोकेका र अनुहारमा रगतको छिटा देखिएका सुशिलको यो अवतारले चलचित्रको एक्सन-जनरालाई स्पष्ट रूपमा झल्काउँछ।
विक्की महर्जनको निर्देशनमा तयार भएको यो चलचित्रको निर्माण अमित अग्रहरिले गरेका हुन् ।
चलचित्रमा सुशिल श्रेष्ठसँगै शिक्षा संग्रौला, नरेश पौडेल, सुमन भण्डारी, र सोनी लगुनले अभिनय गरेका छन् । विनोद कठायत कार्यकारी निर्माता रहेको यस चलचित्रमा विकास चौधरी सह-निर्माताको रूपमा छन् ।
चलचित्रको प्राविधिक पक्ष पनि बलियो बनाइएको छ । नवीन गुरुङको छायांकन (डीओपी), साहिल खानको सम्पादन, विक्की महर्जनको लेखन, चुल्ठे काजीको एक्सन निर्देशन यसका मुख्य आकर्षण हुन् ।
निर्माण पक्षका अनुसार ४० लाख रुपैयाँको लगानीमा नयाँ एक्सन दृश्य खिचिएको छ, जसले चलचित्रलाई थप रोमाञ्चक बनाउने अपेक्षा गरिएको छ ।
यो चलचित्रले नायक सुशिलको फिल्म क्षेत्रमा बलियो पुनरागमन गराउने विश्वास निर्माण पक्षले व्यक्त गरेको छ। चलचित्रप्रेमी दर्शकहरूको प्रतिक्षा अब फागुन २९ गते टुंगिनेछ ।
