सिनेमा आर्ट र वि मोसन पिक्चर्सको सहकार्यमा निर्माण भएको चलचित्र ‘फेरि रेशम फिलिली’को दोस्रो क्यारेक्टर पोस्टर सार्वजनिक गरिएको छ ।
बुधबार सार्वजनिक पोस्टरमा सिनेमाका तीन प्रमुख कलाकार विनय श्रेष्ठ, कामेश्वर चौरसिया तथा सुपुष्पा भट्टलाई प्रस्तुत गरिएको छ ।
एक पोस्टरमा अभिनेता विनय श्रेष्ठलाई भुइँमा पछारिएको अवस्थामा हातमा पासपोर्ट देखाइरहेको देख्न सकिन्छ । त्यही पोस्टरमा अभिनेत्री सुपुष्पा भट्ट आक्रोशपूर्ण शैलीमा बन्दुक ताकेर उभिएकी छिन् भने कामेश्वर चौरसिया दुई हात जोडेर माफी मागिरहेको देखिन्छ ।
पोस्टरको नेपथ्यमा नेपालको धरहरा र अमेरिकाको ‘स्ट्याचु अफ लिबर्टी’ को दृश्य समेटिएको छ, जसले धेरै नेपालीको अमेरिका जाने सपनासँग जोडिएको कथाको संकेत गर्छ । सुपुष्पाले विनयमाथि तेर्स्याएको बन्दुक सिनेमाको मुख्य रहस्यसँग जोडिएको अनुमान गर्न सकिन्छ ।
दोस्रो पोस्टरमा सिनेमाका सबै कलाकारलाई क्यारेक्टर लुक्समा देखाइएको छ । यसले गर्दा चलचित्र मनोरञ्जनात्मक हुने संकेत मिलेको छ ।
निरज महर्जनको लेखन तथा निर्देशन रहेको सिनेमामा विनय श्रेष्ठ, सुपुष्पा भट्ट, कामेश्वर चौरसिया, नीर शाह, प्रकाश घिमिरे, शिशिर वाङ्गदेल, रविन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापा लगायतका कलाकारको अभिनय रहेको छ ।
चलचित्र ‘रेशम फिलिली’ का निर्देशक प्रनव जोशी र अभिनेत्री मेनुका प्रधानबाहेकका अधिकांश पुरानै टिम ‘फेरि रेशम फिलिली’ मा दोहोरिएका छन् ।
सिनेमाको छायांकन सुसन प्रजापतीले गरेका हुन् भने पटकथा निर्देशक महर्जन र आकाश बरालले लेखेका छन् । द्वन्द्व निर्देशन नरेश किङ्ग योगीले गरेका छन् ।
सिनेमाका गीतहरूमा कालीप्रसाद बाँस्कोटा, एसडी योगी, हर्क साउद, जयन जे वाइवा र दीपक शर्माले संगीत भरेका छन् । सम्पादन सुरेन्द्र पौडेलको रहेको छ ।
सिनेमाका निर्माता रौनक विक्रम कडेल हुन् भने कार्यकारी निर्माता सुरज बम ठकुरी रहेका छन् । सह-निर्मातामा एनि थापा छन् ।
चलचित्रको वितरण गोविन्द शाहीको काफिया फिल्मस् र कुवेर सिने डिष्ट्रीव्युसनले गर्नेछन् ।
