काठमाडौं । चलचित्र ‘परालको आगो’ मा अभिनेता जितु नेपाल अनुबन्धित भएका छन् । कथाकार गुरुप्रसाद मैनालीको कृतिमा आधारित रहेर निर्माण हुन लागेको यो चलचित्रका लागि निर्माता सुशील पोखरेलले जितुलाई अनुबन्ध गरेका हुन् ।
मैनाली कथा पुरस्कार ट्रस्टले केही महिनाअघि हरिओम सिने मेकर्सलाई फिल्म निर्माणको अनुमति प्रदान गरिसकेको छ । ‘परालको आगो’ कथाकार मैनालीको चर्चित कथा संग्रह ‘नासो’मा संग्रहित रहेको कथा हो ।
निर्माता पोखरेलका अनुसार जितु नेपाल चलचित्रका प्रमुख दुई पात्रमध्ये एक हुन् । ‘अर्को प्रमुख पात्र पनि चाँडै फाइनल हुनेछ । त्यस्तै, सेकेण्ड लिडका लागि एक महिला कलाकारको पनि चयन हुन बाँकी छ,’ निर्माता पोखरेलले जानकारी दिए । चलचित्रको कथा चामे, गौँथली र जुठे दमाईको वरिपरि घुम्नेछ भने जितु नेपाल चामे वा जुठे दमाईमध्ये एकको भूमिकामा देखिनेछन्, जसलाई हाल सस्पेन्समा राखिएको छ ।
चलचित्रको छायांकन संकल्प भुजेलले गर्नेछन् भने कोरियोग्राफी रामजी लामिछानेले गर्नेछन् । संगीत सत्य–स्वरुपराज आचार्यको रहनेछ भने फिल्मका निर्माण नियन्त्रण नगेन्द्र घिमिरेले गर्नेछन् ।
यसअघि नै अभिनेत्री सुहाना थापा चलचित्रका लागि फाइनल भइसकेकी छिन् । निर्माता पोखरेलका अनुसार फिल्मको प्रदर्शन २०८२ सालमा गर्ने योजना छ । उल्लेखनीय कुरा के छ भने, यही नाममा ४५ वर्षअघि निर्देशक प्रताप सुब्बाले पनि फिल्म निर्माण गरेका थिए ।
निर्माता पोखरेलले यो चलचित्रलाई फरक शैलीमा प्रस्तुत गर्न लागेको बताएका छन् । लोकेसन, पटकथा र प्रस्तुतीकरणलाई विशेष ध्यान दिइनेछ । चलचित्रको निर्देशन लक्ष्मण सुनारले गर्नेछन् । कथामा चामे र गौँथली पात्रको झैँझगडा प्रस्तुत गरिनेछ ।
निर्माता पोखरेलले यसअघि ‘मैदान’, ‘जीवनदाता’, ‘निगरानी’, ‘जय शिव शंकर’, ‘लभ सभ’, ‘राधे’ र ‘यात्रा’ जस्ता चलचित्र निर्माण गरिसकेका छन् ।
