आगामी चैत २४ गतेबाट प्रदर्शनमा आउन लागेको चलचित्र ‘प्रसाद २’को पहिलो गीत सार्वजनिक गरिएको छ ।
सुदर्शन थापा निर्देशित चलचित्र ‘प्रसाद २’ले बक्स अफिसमा सुखद कमाई गर्ने अपेक्षा फिल्मीकर्मी, यसको निर्माणपक्ष र वितरकमा छ । चलचित्रको ट्रेलर सार्वजनिक भएसँगै नै यसले चर्चा पनि पाइरहेको छ ।
यसैबिच, चलचित्रमा समावेश पहिलो गीत ‘मार्सी धान’ आज रिलिज गरिएको छ । ओएसआर डिजिटलबाट सार्वजनिक गरिएको गीतमा राजनराज सिवाकोटी र मिलन नेवारको स्वर, राजनराजकै शब्द तथा संगीत छ ।
लोकशैलीमा तयार पारिएको गीतले दर्शक तथा श्रोताको मन जित्ने विश्वास गर्न सकिन्छ । यो गीतको भिडियोलाई विक्रम स्वारले कोरियोग्राफी गरेका छन् ।
गीतको भिडियोमा चलचित्रका मुख्य कलाकारद्धय विपिन कार्की र केकीको अधिकारीको साथमा म्युजिक भिडियोमा जमेको जोडी आश्मा विश्वकर्मा र सरोज अधिकारीको नृत्य हेर्न सकिन्छ ।
चलचित्रमा अर्पण थापा, महेश त्रिपाठी लगायतका कलाकारको पनि मुख्य भूमिका छ । राजेश श्रेष्ठको छायांकन रहेको चलचित्रमा मिलन श्रेष्ठको सम्पादन छ ।
सुदर्शन बस्नेतको लगानीमा बनेको चलचित्रको प्रस्तुतकर्ता सुभाष थापा हुन् ।
