आजबाट नेपालभर नयाँ नेपाली चलचित्र ‘प्रेमा’ रिलिज भएको छ । फागुनको १९ गते यता कुनै नेपाली चलचित्र रिलिज भएका थिएनन् । ‘छक्का पञ्जा ४’ र ‘छड्के २’ रिलिजको झण्डै १ महिनापछि हलमा नयाँ नेपाली चलचित्र प्रदर्शनमा आएको हो ।
गोविन्द सिंह भण्डारीको निर्देशनमा तयार भएको चलचित्र ‘प्रेमा’मा अरुण क्षेत्री, शुभेक्षा खड्का र श्रृष्टी श्रेष्ठ मुख्य भूमिकामा छन् ।
चलचित्रले मल्टिप्लेक्समा कम शोज पाएको छ । यदि, व्यापारमा बढेको खण्डमा चलचित्रको शोज पनि बढ्ने पक्का छ । प्रिमियरमा मिश्रित प्रतिक्रिया पाएको यो चलचित्रलाई निर्देशक भण्डारीले केही फरक शैलीमा प्रस्तुत गर्ने कोशिश गरेका छन् ।
प्रेमकथामा आधारित चलचित्र ‘प्रेमा’ अभिनेता अरुण क्षेत्री र अभिनेत्रीद्वय शुभेच्छा खड्का र सृष्टी श्रेष्ठमै केन्द्रित छ । चलचित्रमा अरुण र शुभेक्षाको प्रेमलाई बुनिएको छ । श्रृष्टीको भूमिका दर्शकका लागि सरप्राइज हुनसक्छ ।
प्राविधिक रुपमा भने यो चलचित्र बलियो छ । चलचित्रको छायांकनपक्ष राम्रो छ ।
चलचित्रमा विमला केसी, हिउँवाला गौतम, पुरण जोशी, सविन बास्तोला, रोशनी स्याङ्बो, प्रकाश बस्नेत, महान थापा, सुरेन्द्र बसेल, भिभियाना थपलियालगायतले अभिनय गरेका छन । चलचित्र ‘प्रेमा’लाई उपत्यकामा जिजीए ग्रुप र मोफसलमा एफडी कम्पनीले वितरण गरेको हो । विवेक घिमिरे यस चलचित्रका निर्माता हुन् ।
