नेपाल र भारतका दुई फिल्म सम्बद्ध संस्थाहरु आफ्नो मुलुकमा बनेका चलचित्रलाई एकअर्काको देशमा रहेका ओटीटी र हलमा रिलिज गर्न सहमत भएका छन् । आइतबार चलचित्र विकास बोर्डमा आयोजित इन्डो–नेपाल फिल्म एक्सचेन्ज समिट २०२३ मा यस्तो सहमति जुटेको हो ।
नेपाल चलचित्र प्रमोसन सर्किट (एनएफपीसी) र चलचित्र एण्ड टेलिभिजन प्रमोसन काउन्सिल (एफटीपीसी)बीच दुई मुलुकबीच संस्कृतिसँगै फिल्मको बजार आदानप्रदान गर्ने सहमति जुटेको हो ।
समिटको प्रमुख अतिथिको रुपमा सहभागि चलचित्र विकास बोर्डका अध्यक्ष भुवन केसीले द्धिपक्षीय सहमतिलाई नेपाली चलचित्रको हितमा प्रयोग गर्न आग्रह गरे । नेपालमा छायांकन हुने दक्षिण भारतीय चलचित्रलाई स्वागत गर्न बोर्ड आतुर रहेको बताउँदै उनले एकअर्काको बजार खोज्ने कुरा सकारात्मक रहेको चर्चा गरे ।
एनएफपीसीकी अध्यक्ष नुतन न्यौपानेले सांस्कृतिक आदाप्रदानको रुपमा आफूहरुले एकअर्काको चलचित्रलाई रिलिज गर्ने तयारी गरिरहेको बताइन् । उनका अनुसार नेपाली चलचित्रलाई तेलुगु भाषामा डबिङ गरेर दक्षिण भारतका ओटीटीमा रिलिज गरिनेछ । यसका लागि आफूहरुसँग १५ देखि १८ वटा ओटीटी प्लेटफर्म रहेको जानकारी उनले दिइन् ।
‘राम्रा र स्तरीय नेपाली फिल्मलाई दक्षिण भारतीय ओटीटी प्लेटफर्ममा रिलिज गर्ने हाम्रो तयारी छ । जतिसक्दो चाँडो फिल्म रिलिज हुनेछ’ उनले भनिन्, ‘जसले गर्दा नेपाली चलचित्र पर्यटनदेखि बजारीकरणसम्म फाइदा हुने हामीलाई विश्वास छ ।’
एनएफपीसी महासचिव तथा निर्देशक हिमाल न्यौपानेले स्तरीय दक्षिण भारतीय चलचित्रलाई नेपाली ओटीटी प्लेटफर्म र हलमा रिलिज गर्नेबारे गृहकार्य भैरहेको बताए । ‘नेपाली चलचित्रलाई केरला र तामिल सहितका दक्षिण भारतीय राज्यमा रिलिज गर्ने योजना छ’ उनले भने, ‘नेपाली चलचित्रको अन्तर्राष्ट्रियकरण होस् भन्ने हाम्रो चाहना हो ।’
एफटीपीसी सचिव पीभीएस बर्माले नेपाल र भारतबीच कला र सांस्कृतिक आदानप्रदान गर्न आफूहरु लागिपरेको बताए । ‘चलचित्र आदानप्रदान भनेको व्यवसायको सम्भावना, प्रविधि र कास्ट एण्ड क्रिउ आदानप्रदान पनि हो’ बर्माले भने, ‘चलचित्रमार्फत हामी दुई देशबीच प्रशस्त सम्भावना विस्तार गर्न चाहन्छौं ।’
एफटीपीसी अध्यक्ष चैतन्य जंगको नेतृत्वमा दक्षिण भारतीय चलचित्र टोली केही दिनदेखि काठमाडौंमा छ । टोलीले नेपाली चलचित्रको बजार र सम्भावनाबारे अध्ययन गरिरहेको छ । समारोहाम अध्यक्ष जंगले नेपाल र भारतबीच छायांकन थलो आदानप्रदान पनि महत्वपूर्ण पक्ष बन्न सक्ने बताए ।
वक्ताहरुले एकअर्कोको मुलुकमा संयुक्त लगानीका चलचित्र निर्माणको सम्भावनाबारे पनि जोड दिएका थिए । अभिनेता कृष्ण मल्लले द्धिपक्षीय सहमतिका लागि शुभकामना दिए । समिटको क्रममा नेपाली चलचित्रलाई अन्तर्राष्ट्रिय गर्न महत्वपूर्ण भूमिका खेल्ने कलाकार, संगीतकर्मी, प्रदर्शक, निर्माता र निर्देशकलाई सम्मान प्रदान गरिएको थियो ।
