दक्षिण भारतीय सुपरस्टार अल्लु अर्जुनलाई हैदराबादको नामपल्ली अदालतले १४ दिनका लागि न्यायिक हिरासतमा पठाएको छ। गत शुक्रबार हैदराबाद प्रहरीले उनलाई घरमै पक्राउ गरेको थियो।
यो गिरफ्तारी हैदराबादमा डिसेम्बर ४ मा भएको भागदौडको घटनासँग सम्बन्धित छ। फिल्म पुष्पा–२ को स्क्रिनिङका क्रममा सन्ध्या थिएटर नजिक मच्चिएको भागदौडमा एक महिलाको मृत्यु भएको थियो भने उनका छोरा गम्भीर घाइते भएका थिए।
पक्राउ पछि प्रहरीले उनलाई चिक्कडपल्ली प्रहरी चौकीमा लगेर सोधपुछ गरेको थियो। प्रहरीका अनुसार अल्लु अर्जुनलाई गान्धी अस्पतालमा मेडिकल जाँचका लागि लगिएको थियो, जहाँ सुरक्षा व्यवस्थामा कडाइ गरिएको थियो। अभिनेता र उनका समर्थकहरूले भने प्रहरीले पक्राउ गर्ने क्रममा अमानवीय व्यवहार गरेको आरोप लगाएका छन्।
अल्लु अर्जुनले यसअघि सामाजिक सञ्जाल प्लेटफर्म ‘एक्स’ मार्फत घटनाको लागि माफी मागेका थिए र पीडित परिवारलाई २५ लाख रुपैयाँ सहयोग गर्ने घोषणा गरेका थिए। तर, मृतक महिलाको परिवारले उजुरी दिएपछि प्रहरीले उनलाई र फिल्म स्क्रिनिङका लागि जिम्मेवार सुरक्षा टोलीसहित थिएटर व्यवस्थापनविरुद्ध मुद्दा दर्ता गरेको थियो।
भारतीय दण्ड संहिताको धारा १०५ र ११८ (१) अन्तर्गत दर्ता गरिएको यो मुद्दामा दोषी पाइएमा न्यूनतम पाँच वर्षदेखि आजीवन कारावाससम्मको सजाय हुने व्यवस्था छ। घटनापछि थिएटरका सञ्चालक र सुरक्षाका इन्चार्जलाई पनि प्रहरीले पक्राउ गरिसकेको छ।
यतिबेला अल्लु अर्जुनको पुष्पा–२ ले साउथ फिल्म उद्योगदेखि हिन्दी क्षेत्रसम्म चर्चा कमाइरहे पनि यो घटनाले फिल्मको चर्चा विवादमा बदलिएको छ। न्यायालयको थप आदेश आउन बाँकी रहेको यो घटनाले फिल्म उद्योगमा ठूलो प्रभाव पारेको छ।
