मनोरञ्जनको दुनियाँ सधैं चमक-धमक र विवादले भरिपूर्ण रहन्छ। सन् २०२४ पनि बलिउड र साउथ चलचित्र क्षत्रका लागि यो परिपाटीबाट अछुतो रहन सकेन। यो वर्ष फिल्मी संसारका केही प्रमुख विवादहरू सार्वजनिक भए। यी घटनाले दर्शकलाई छक्क पारेको मात्र होइन, उद्योगमा नयाँ प्रश्न पनि उठाए।
०२४ सकिन लाग्दा मनोरञ्जन क्षेत्रमा वर्षभरि बलिउड र साउथ चलचित्र क्षत्रमा नयाँ स्टारकिड्सको डेब्युदेखि फिल्म रिलिज र पारिवारिक घटनासम्म, यो वर्षले कैयौं उतार-चढाव देखायो। तर, हरेक वर्षजस्तै, यस पटक पनि केही घटनाहरू विवादमा तानिए। यहाँ २०२४ का १० ठूला विवादहरूको सूची प्रस्तुत गरिएको छ।
१. सलमान खानको घरमा गोलीकाण्ड र धम्की
सालको सुरुबाटै सलमान खानको नाम चर्चामा रह्यो। जनवरीमा दुई अपरिचित युवाले उनको फार्महाउसमा प्रवेश गर्दा हंगामा भयो। अप्रिलमा भने उनको ग्यालेक्सी अपार्टमेन्ट बाहिर गोलीकाण्ड भयो। पाँच राउन्ड गोली प्रहार गरिएको घटनालाई बिश्नोई गिरोहसँग जोडिएको छ। सलमानको सुरक्षा अझै कडा बनाइएको छ।
२. रेणुकास्वामी हत्या प्रकरण
साउथ अभिनेता दर्शन थुगुडेपालले आफ्नै फ्यान रेणुकास्वामीको हत्या गरेको आरोपपछि यो मुद्दा चर्चामा आयो। यो हत्याकाण्ड जुन महिनामा सार्वजनिक भएको थियो। अदालतले हाल दर्शनलाई जमानत दिएको छ, तर यो केसले साउथ फिल्म उद्योगलाई नै हल्लायो।
३. ‘फाइटर’को विवादास्पद किस दृश्य
जनवरीमा रिलिज भएको फिल्म ‘फाइटर’को किस दृश्यले हलचल मच्चायो। ऋतिक रोशन र दीपिका पादुकोणबीचको यो दृश्यप्रति पूर्व आईपीएस अधिकारीले आपत्ति जनाउँदै कानुनी नोटिस पठाएका थिए। सामाजिक सञ्जालमा यसले विभाजन ल्यायो।
४. पुनम पाण्डेको मृत्युको झुटो खबर
पुनम पाण्डेको निधन भएको गलत समाचार फैलियो, जसले सबैलाई चकित तुल्यायो। यो उनको क्यान्सरको जनचेतना अभियानको एक भाग रहेको कुरा पछि खुल्यो। यस घटनाले उनलाई वर्षको चर्चित व्यक्तित्व बनायो।
५. प्रभासविरुद्ध अर्शद वारसीको टिप्पणी
‘कल्की २८९८ ईस्वी’मा प्रभासलाई ‘जोकर’ भन्ने टिप्पणीले बलिउड र साउथबीचको बहसलाई पुनः बलियो बनायो। अर्शद वारसीले पछि स्पष्टीकरण दिए पनि विवाद धेरै समयसम्म साम्य हुन सकेन।
६. आलिया भट्टको ‘जिगरा’को नक्कली कलेक्सन विवाद
आलिया भट्ट अभिनीत ‘जिगरा’लाई टी-सिरिजका मालिक दिव्या खोसला कुमारले नक्कली बक्स अफिस कलेक्सन देखाएको आरोप लगाए। यसले करण जोहर र दिव्या बीचको तीव्र बहसलाई जन्म दियो।
७. एआर रहमानको सम्बन्धविच्छेद
नोभेम्बर १९ मा एआर रहमानले २९ वर्षको वैवाहिक जीवनपछि श्रीमती सायरा बानोसँगको सम्बन्धविच्छेदको घोषणा गरे। सामाजिक सञ्जालमा यसले विभिन्न ट्रोल र प्रतिक्रियाको सामना गर्नुपर्यो।
८. सामन्था-नागाको सम्बन्धविच्छेदमा मन्त्रीको टिप्पणी
तेलंगाना मन्त्री कोंडा सुरेखाले सामन्था र नागा चैतन्यको सम्बन्धविच्छेदबारे दिएको विवादास्पद टिप्पणीले हंगामा मच्चायो। सामन्था र नागाले यो टिप्पणीको कडा विरोध गरे।
९. सुनिल पाल र मुश्ताक खानको अपहरण
हास्य कलाकार सुनिल पाल र अभिनेता मुश्ताक खानको अपहरणले सबैलाई स्तब्ध बनायो। गिरोहले फिल्म कलाकारहरूलाई अपहरण गरी फिरौती असुल्ने गरेको तथ्य बाहिर आयो।
१०. ‘पुष्पा २’ को प्रिमियर विवाद
अल्लु अर्जुन अभिनीत ‘पुष्पा २’ को प्रिमियरका क्रममा भागदौड मच्चिँदा एक महिलाको मृत्यु भयो। यस मुद्दामा अल्लु अर्जुनलाई पक्राउ गरियो, तर पछि रिहा गरियो।
मनोरञ्जन उद्योगमा २०२४ का यी घटना र विवादहरूले ठूलो तरंग ल्यायो। यी विवादहरू आगामी वर्षहरूमा पनि सम्झनामा रहिरहनेछन्। आशा गरौँ, २०२५ विवादभन्दा उपलब्धिहरूले भरिपूर्ण हुनेछ।
