फिल्म ‘उपहार’ मा मोफसलबाट काठमाडौँ आएर सङ्घर्ष गर्नेको कथालाई महिला पात्रमार्फत चित्रण गरिएको निर्देशक ज्ञानेन्द्र देउजाले बताए । आउँदो शुक्रबार (फागुन २५ गते) देखि प्रदर्शन गरिने उपहारको विषयमा जानकारी दिँदै देउजाले तीन महिला पात्रले फिल्मलाई अगाडि बढाउने जानकारी दिए ।
“मैले आफ्नो कथालाई महिला पात्रमार्फत भन्ने कोशिस गरेको छु । यो नारीप्रधान फिल्म हो । हामीले पुरुष पात्रमार्फत कथा भन्ने एकै किसिमका फिल्म दर्शकमाझ ल्याउनु हुन्न् भन्ने लागेर नयाँ धार र सङ्घर्षको कथा ल्याएको हो”, निर्देशक देउजाले भने, “यो फिल्म हेर्दा दर्शकले आफ्नै कथा महसुस गर्नु हुन्छ । उहाँहरूकै दुःख, भोगाइ र जीवनलाई फिल्ममा ल्याउने प्रयास गरेको छु ।”निर्देशक देउजाले फिल्ममार्फत नयाँ प्रतिभालाई अवसर दिएको जानकारी दिए । देउजाका अनुसार अभिनेता, गायक, गायिकाले पहिलोपटक चलचित्रमा काम गरेका छन् । उनले भने, “मैले अघिल्ला फिल्ममा पनि नयाँ प्रतिभालाई दर्शकसम्म ल्याउने गरेको थिएँ । हामीले नयाँ र पुराना कलाकारलाई साथमा ल्याउनुपर्छ । यसले गर्दा चलचित्रलाई नयाँ अनुहार पनि प्राप्त हुन्छ ।”
उनले अभिनेत्री रेखा थापासँग सात बढी फिल्ममा काम गरेकाले सहकार्य सम्भव भएको बताए । अभिनेत्री थापाको निर्माण र अभिनय रहेको फिल्म भएकाले पनि यसमा महिलाका मुद्दालाई उठाइएको देउजाको भनाइ छ ।
“फिल्ममा सामाजिक विषयवस्तुलाई मनोरञ्जनपूर्ण हिसाबले प्रस्तुत गरेका छौँ । यहाँ समाज रुपान्तरणका कुरादेखि समाजमा भइरहने घटनाक्रम पनि उठान गरेका छौँ”, अभिनेत्री थापाले भनिन्, “मेरो चलचित्रले दर्शकलाई मनोरञ्जनसँगै सन्देश दिने गरेको छ । त्यही शैलीलाई निरन्तरता दिएकी छु ।”
‘उपहार’ फिल्ममा अभिनेत्री थापासँगै पूजा शर्मा, बेनिषा हमाल, मुकुन भुसाल, तेज गिरी, समर्पणजङ्ग कार्की, शिशिर राणा, सुष्मा कार्की, विनोदकुमार पौडेललगायत कलाकारले अभिनय छ ।
रेखा फिल्मस् र कपनगढी सिनेमाको ब्यानरमा निर्माण भएको फिल्म वितरण काठमाडौँ उपत्यकामा करण श्रेष्ठ र उपत्यका बाहिर एफडी कम्पनीले गर्नेछ । 
