बोक्सी कुप्रथाको नाममा महिलामाथि हुने अन्याय, अत्याचार र उत्पीडनको कथामा निर्माण भएको फिल्म बोक्सीको घर’को ‘बुझिनँ मैले’ गीतको रिलिज भएको छ । गीतमा महिलालाई विभिन्न शब्दबाट गरिने वर्णन उल्लेख छ । महिलालाई देवी मान्ने र बोक्सीको आरोप पनि लगाउने दुवैथरी सामाजिक मान्यतालाई गीतले प्रश्न गर्छ । फिल्मको मर्मअनुसार नै गीत तयार भएको देखिन्छ । गीतमा प्रकाश सपूतको स्वर, शब्द रचना तथा संगीत रहेको छ । गायनमा उनलाई समीक्षा अधिकारीले साथ दिएकी छन् ।
आगामी बैशाख १४ गतेबाट प्रदर्शन हुन लागेको फिल्मलाई सुलक्षण भारतीले लेखन तथा निर्देशन गरेका हुन् । सुनिल क्षेत्रीको कोरियोग्राफी र भिडियो निर्देशन रहेको गीतमा अभिनेत्री केकी अधिकारीले आकर्षक नृत्य गरेकी छन् । सुलक्षण भारती र रमा थपलिया पनि गीतमा चित्रित छन् । पिपलको रुखबाट सुरु भएको गीत अँध्यारोमा कालो बिरालोलाई चित्रित गर्दै टुंगिएको छ ।
यो फिल्ममा नायिका केकीको अलावा श्वेच्छा राउत, सुष्मा निरौला, सबिन बास्तोला, सुपला सापकोटा लगायतको पनि अभिनय छ । फिल्ममा शिवराम श्रेष्ठको छायांकन र लोकेश बज्राचार्यको सम्पादन छ । ८ वर्षअघि मण्डला थिएटरमा मञ्चन भएको नाटक ‘बोक्सीको घर’मा आधारित भएर फिल्म बनेको हो ।
