बिक्की अग्रवाल र श्रद्धा प्रसाईँले निर्देशन गर्ने टेलिभिजन कमेडी शो ‘कमेडी दरबार’ आगामी असार १४ गतेबाट प्रसारणमा आउने भएको छ । आइतबार राजधानीमा आयोजित प्रेस मिटमा फस्टलुक टिजर सार्वजनिक गर्दै असार १४ गतेबाट प्राइम टाइम टेलिभिजनमा हरेक शुक्रबार ९ बजे र ओएसआर डिजिटलबाट प्रसारण हुने बताइएको छ ।
सार्वजनिक फस्टलुक टिजरमा कमेडी दरबारका कलाकारहरूको लुक्स सार्वजनिक गरिएको थियो । कार्यक्रममा चलचित्र निर्देशक तथा कलाकार दीपाश्री निरौला, कमेडी च्याम्पियनका निर्देशक विशाल भण्डारी, प्राइम टाइम टेलिभिजनका सञ्चालक ऋषि धमला लगायतले कमेडी दरबारलाई शुभकामना दिएका थिए ।
कार्यक्रममा बोल्दै विशाल भण्डारीले आफूहरूसँगै काम गरेका साथीहरूले नयाँ शो ल्याउँदा सबैभन्दा खुसी आफूलाई लागेको भन्दै शुभकामना दिए । पत्रकार ऋषि धमलाले ‘कमेडी दरबार’ लाई प्राइम टेलिभिजनबाट प्रसारण गर्न पाउनु आफ्नो लागी खुसीको कुरा भएको बताए । कार्यक्रममा प्राइम टाइम टेलिभिजनका सीईओ विकास लामिछाने, प्रबन्ध निर्देशक एलिजा गौतम, ओएसआर डिजिटलका ओम अग्रवाल, सुमित्रा थापाको पनि उपस्थिति थियो ।
कमेडी दरबारका कलाकार मध्येकी एक अभिनेत्री गौरी मल्ल महारानीको भूमिकामा देखिँदै छिन् । उनले कमेडीको क्षेत्रमा नयाँ सोच भएका युवाहरूसँग काम गर्न पाउँदा खुसी लागेको बताइन् । उनीसँगै अभिनेता विजय बराल, अभिनेत्री नम्रता सापकोटा, नम्रता श्रेष्ठ, मिस पबीसँगै कमेडीयनहरु हिमेश पन्त, पवन खतिवडा, उत्सव सापकोटा, सुन्दर खनाल लगायतले आफ्नो भूमिकाबारे जानकारी गराएका थिए । उक्त शोका लागि कलाकार व्यवस्थापन तथा मिडिया संयोजनको भूमिकामा गोपिकृष्ण चापागाईं छन् । शोको क्रियटिभ प्रमुखमा विकास अर्याल रहेका छन् भने प्रोडक्सनमा आयुष लुईटेल छन् ।
