भजन शिरोमणि भक्तराज आचार्यको जीवनीमा आधारित फिल्म ‘आचार्य’को ट्रेलर रिलिज भएको छ । विसं २०६८ असोज ६ गते प्रदर्शन भइसकेको यो फिल्मलाई पुनः सम्पादन गरी असार ७ मा प्रदर्शन गरिने तयारी निर्माण टिमको छ ।
यो फिल्म पुनः प्रदर्शनलाई लक्षित गर्दै निर्माण टिमले यसको ट्रेलर सार्वजनिक गरेको हो । फिल्मको ट्रेलर रिलिज गर्दै सत्यराजले भने,-‘बुबाको यो फिल्मलाई पुनः प्रदर्शन गर्न आग्रह आएपछि हामीले प्रदर्शन गर्न लागेका हौँ । यो हेर्नेले बुबाको जीवनीलाई बुझ्न पाउनुहुनेछ’, उनले भने ।
यो फिल्ममा सत्यराज नै पिताको भूमिकामा छन् । फिल्ममा स्वर्गीय गायक आचार्यको जीवनीका हरेक पाटालाई देखाइएको छ। गायक तथा अभिनेता आचार्यले सार्वजनिक यो ट्रेलरले निकै राम्रो प्रतिक्रिया प्राप्त गरिरहेको जानकारी दिए । गायक आचार्यको ८२ वर्षको उमेरमा गत फागुन १४ गते निधन भएको थियो ।
यो फिल्ममा निर्देशक प्रशान्त रसाइलीले निर्देशन गरेको फिल्ममा गायक आचार्यसँगै सुनिल पोखरेल, अरुणा कार्की, दयाहाङ राई, विपिन कार्की, सौगात मल्ललगायत कलाकारको अभिनय रहेको छ ।
