साउन ४ गते रिलिज हुने फिल्म ‘सतीदेवी’को नयाँ गीत रिलिज भएको छ।
फिल्मको ‘लैजा दैब फिर्ता लैजा’ बोलको मार्मिक गीत रिलिज भएको हो। गीतमा छोरी भएका कारण समाज र घरलाई भार भएको अभिनेत्री मलिका महत अभिनित पात्रको मनोदशालाई गीतले प्रस्तुत गर्दछ।
फिल्मका निर्देशक लक्ष्मण सुवेदी हुन्। सुभास भुसालको संगीतमा तयार भएको गीतको शब्द निर्देशक सुवेदीले नै लेखेका हुन्। गीतमा ममता गुरुङको स्वर रहेको छ।
फिल्ममा मलिकाका अलावा रमेश बुढाथोकी, भोलाराज सापकोटा, कुलदीप अधिकारी, सन्दीपबाबु लोहनी, सृजना अधिकारी, मनिषा सापकोटा, सुजिता सिवाकोटी, तुलसी श्रेष्ठको पनि अभिनय छ । निर्देशक सुवेदी स्वयंको लेखन रहेको फिल्मको निर्माता श्रीदेवी, दिलासा र सारा सुवेदी हुन् ।
दिलाशा क्रियसन र गोल्डेन स्टेट मुभी मेकर्स एलएलसी क्यालिफोर्नियाको संयुक्त प्रस्तुति रहेको फिल्ममा बाबु श्रेष्ठले छायांकन, दीपक शर्मा र सुवास भुसालको संगीत तथा रामजी लामिछानेको कोरियोग्राफी छ । फिल्मले प्रदर्शन नहुँदै केही फेस्टिभलमा महत्त्वपूर्ण विधामा अवार्ड जितिसकेको छ ।
