चलचित्र ‘फूलबारी’ को ट्रेलर सार्वजनिक भएको छ ।
आज मंगलवार सार्वजनिक गरिएको ट्रेलरमा पारिवारिक सम्बन्धको कथावस्तुमा आधारित छ ।
चलचित्र ‘कबड्डी’ फेम्ड रामबाबु गुरुङ निर्देशित फिल्म ‘फूलबारी’को ४ मिनेट ९ सेकेन्डको ट्रेलरमा बुढेसकालका बाबु आमा प्रतिको जिम्मेवारीबाट सन्तान कसरी पन्छिन्छन् भनेर देखाउन खोजिएको छ ।
ट्रेलरले एउटा सुखी घर असमझारीले कसरी उजाडिन्छ र दाम्पत्य जीवनमा प्रेम कति महत्वपूर्ण हुन्छ भन्ने सन्देश यसले दिन खोजेको छ । समग्रमा पुस्तान्तरले एउटा परिवारमा ल्याउने संकटको कथा हो फूलबारी भन्न सकिन्छ।
फागुन ५ गतेबाट प्रदर्शनमा आउने तयारीमा रहेको ‘फूलबारी’लाई यशोधा फिल्मस्ले निर्माण गरेको हो । यस चलचित्रको कथा कमल किशोर मलपानी र पटकथा उपेन्द्र सुब्बाले लेखेका हुन् । कालिप्रसाद बाँस्कोटा र अनुपम शर्माको संगीत रहेको चलचित्रलाई अमेरिकी छायाँकार जोस हेरमले खिचेका हुन् । मनिष ढकाल निर्माता रहेको चलचित्रको कार्यकारी निर्माता मणीराम पोखरेल हुन् ।
चलचित्रमा विपिन कार्की, अरुणा कार्की, दयाहाङ राई, प्रियंका कार्की, शिल्पा मास्के, सोमनाथ खनाल, अनुपम शर्मा, मनिष ढकाल, लोकेन्द्र लेखक, साक्षी गुरुङ गौमाया गुरुङ, रुजा राउत, रुपेश दाहाल, सुमित्रा गोम्जा, कायरा कार्की, सोफिया राईलगाएतको अभिनय रहेको छ ।
