निर्देशक दीपेन्द्र के खनालको निर्देशनमा बन्न लागेको फिल्म ‘के घर के डेराः घर नम्बर २’मा कलाकार तथा निर्देशक निश्चल बस्नेत अनुबन्धित भएका छन् ।
सामाजिक कथावस्तुमा निर्माण हुने यो फिल्मको मुख्य भूमिकामा अनुबन्धित भएका हुन् । यसअघि फिल्ममा अभिनेता खगेन्द्र लामिछाने अनुबन्धित भइसकेका छन् ।
साउनको २५ गतेबाट छायांकनमा जान लागेको फिल्मको मुख्य भूमिकामा बस्नेतलाई अनुबन्धित गरिएको निर्देशक खनालले जानकारी दिए ।
फिल्ममा अनुबन्धित भएपछि कलाकार बस्नेत उत्साहित देखिए । उनले, फिल्मको कथावस्तु बलियो रहेकाले आफू काम गर्न तयार भएको बताए ।
निश्चलको प्रवेशसँगै फिल्मको लाइनअप बलियो बन्ने देखिएको छ । फिल्मका लागि अझै चार जना कलाकारहरूलाई मुख्य भूमिका अनुबन्धित गर्न बाँकी रहेको निर्माण पक्षले बताएको छ ।
यो फिल्मको कथा चर्चित लेखक बुद्धि सागरले लेखेका हुन् ।
ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको फिल्ममा शरद श्रेष्ठ, किरण महर्जन र राजिव श्रेष्ठ निर्माताको रूपमा छन् । युवराज कार्की फिल्मका कार्यकारी निर्माता हुन् ।
यसै वर्ष रिलिज गर्ने योजना राखिएको यो फिल्मलाई काठमाडौँमा रिच इन्टरटेन्मेन्ट र काठमाडौँ बाहिर एफडी कम्पनीले वितरण गर्ने पक्का भइसकेको छ ।
