चलचित्र ‘ह्यारी कि प्यारी’को आज काठमाडौँमा प्रिमियर गरिएको छ ।
मंगलवार कमलपोखरी सिटी सेन्टर स्थित विग मुभिजमा आयोजना गरिएको प्रिमियरमा चलचित्र क्षेत्रका चर्चित कलाकारहरू र मिडियाकर्मी उपस्थित रहेका थिए ।
शुक्रवारदेखि रिलिज हुन लागेको यो चलचित्रलाई प्रिमियरमा उत्कृष्ट प्रतिक्रिया प्राप्त भएको छ । प्रदर्शन हुने मिति भन्दा ३ दिन अगाडि नै प्रिमियर गरेर निर्माण युनिटले सेलिब्रेटी र मिडियाकर्मीलाई चलचित्र देखाएको हो । जसमा प्रिमियर हेर्न पुगेकाहरूले दिएको प्रतिक्रियाबाट चलचित्र ‘ह्यारी कि प्यारी’ टिम पनि थप उत्साहित भएको छ ।
प्रिमियर हेर्न पुगेका चर्चित कलाकार र केही पत्रकारले खुलेर प्रशंसा गरेका छन् । चलचित्र हेर्न मदन कृष्ण श्रेष्ठ, सन्तोष पन्त, दीपकराज गिरी, दीपाश्री निरौला, केदार घिमिरे, किरण केसी, शिवहरि पौडेल, रमेश उप्रेती निर्देशक विशाल भण्डारी, आकाश अधिकारी, ज्ञानेन्द्र देउजा गायक यश कुमार लगायत पुगेका थिए । उनीहरूले प्रिमियर हेरेर निस्किएपछि यसले उठान गरेको विषयवस्तु उत्कृष्ट भन्दै प्रशंसा गरे । यस्तै, यो चलचित्र सबैलाई हेर्न समेत आग्रह गरेका छन् ।
डाक्टर कपिल रिजालको निर्देशनमा तयार भएको यो चलचित्रले फरक सोच बोकेका ह्यारी र प्यारीको कथालाई प्रस्तुत गरेको छ । चलचित्रमा जितु नेपाल र साम्राज्ञी राज्यलक्ष्मी शाहले उत्कृष्ट काम गरेका छन् । चलचित्रमा विजय बरालको भूमिकाले भने दर्शकलाई धेरै हदसम्म होल्ड गरेको छ । उनको सिच्वेसनल कमेडीले चलचित्रमा रोमाञ्चकता थपिदिएको छ।
डाक्टर कपिल रिजालको कथा तथा निर्देशनमा तयार भएको चलचित्रमा जितु, साम्राज्ञी र विजय बरालसँगै लक्ष्मी गिरी, सुवास गजुरेल, नरेश पौडेल, रञ्जना भट्टराई, समीक्षा पौडेल, रमेश अधिकारी, डिल्लीराम खनाललगायतका कलाकारको अभिनय हेर्न सकिन्छ ।
चलचित्रलाई सुदिप बराल, गिरिराज घिमिरे, अभिमन्यू निरबी र डाक्टर कपिल रिजाल मिलेर लेखेका हुन् । सुदिप बरालको छायांकनमा तयार भएको यो चलचित्रमा अर्जुन जीसीको सम्पादन, कविराज गहतराजको कोरियोग्राफी छ ।
डाक्टर भोला रिजालको लगानीमा बनेको यो चलचित्रले बक्स अफिसमा सुखद कमाई गर्ने अपेक्षा गरिएको छ ।
