चलचित्र ‘ज्याकीः आई एम ट्वान्टी वान’को टिजर सार्वजनिक भएको छ । आउँदो बर्षको बैशाख २१ गतेबाट रिलिज हुन लागेको यो लचित्रको टिजरमा नायक धिरज मगरलाई मात्र देखाइएको छ ।
टिजरमा धिरजको सपनाको कथा भन्न खोजिएको छ । बाबु र आफ्नो सपना फरक हुँदा एक यूवकले गरेको संघर्षलाई टिजरमा प्रस्तुत गरिएको छ ।
चलचित्रमा धिरज मगरको साथमा जसिता गुरुङ, अरुण क्षेत्री, प्रेम सुब्बा, लुनिभा तुलाधर, पल्पसा डंगोल, राजु भुजु, सुजता राई लगायतका कलाकारको अभिनय छ ।
यो चलचित्रमा सुशान्त प्रजापतिको छायांकन, निमेष श्रेष्ठको सम्पादन, रेनशा राई राना र सोमनाथ खनालको संवाद छ ।
कालिप्रसाद बाँस्कोटा र रोहित शाक्यको संगीत रहेको चलचित्रको निर्देशन रेनशा राई रानाले गरेकी हुन् ।
चलचित्र ‘आई एम ट्वान्टी वान’ले एक यूवाको डान्सको सपनालाई प्रस्तुत गरेको छ । टिजर हेर्दा पनि चलचित्रको मेकिङ उच्च देखिएको छ । धिरजले चलचित्रका लागि निकै मिहिनेत गरेको प्रष्ट हुन्छ । आईकोर फिल्मस्को ब्यानरमा यो चलचित्र निर्माण भएको हो । आईकोर फिल्मस्ले निर्माण गरेको चलचित्र ‘इन्टु मिन्टु लण्डनमा’ले पनि बक्स अफिसमा गज्जबको व्यापार गरेको थियो ।
