चलचित्र ‘एक्टर: टेक वन’ का दुई नयाँ पोस्टर र मोशन पोस्टर सार्वजनिक गरिएको छ । माघ १६ गते प्रदर्शन हुने यस चलचित्रको प्रचार सामग्रीका रूपमा यी पोस्टरहरू सार्वजनिक गरिएको निर्देशक राजन भुसालले बताए ।
निर्माण पक्षले सार्वजनिक गरेको एक पोस्टरमा प्रदिप खड्का, आना शर्मा, दिव्या रायमाझी र राजबल्लभ कोइरालालाई प्रस्तुत गरिएको छ भने अर्को पोस्टरमा खड्का र कोइरालालाई मात्रै देखाइएको छ । विजय बस्यालले डिजाइन गरेका यी पोस्टरहरूले चलचित्रको भावनात्मक र थ्रिलिङ पक्षलाई उजागर गरेका छन् ।
चलचित्रमा प्रदिप खड्काको प्रमुख भूमिका रहेको छ भने राजबल्लभ कोइरालाले १० वर्षपछि ठूलो पर्दामा पुनरागमन गरेका छन् । दिव्या रायमाझीले यही चलचित्रबाट अभिनय यात्रा सुरु गरेकी छन् ।
राजन भुसालको निर्देशनमा बनेको यो चलचित्रमा स्क्रिप्ट आकाश बराल र भुसालले लेखेका हुन् । नरेन्द्र मैनालीको छायांकन र निमेष श्रेष्ठको सम्पादन रहेको चलचित्रमा संगीत हर्कुलस बस्नेत, रोहित शाक्य र एलिस कार्कीले दिएका छन् ।
‘एक्टर: टेक वन’ लाई अदृत फिल्म्स र अ मोती फिल्मले संयुक्त रूपमा निर्माण गरेका हुन् । यो चलचित्रका निर्माता थमन कुमार भण्डारी हुन् भने अनिश भुसाल सह–निर्माता र मोती कार्की क्रिएटिभ प्रोड्युसर हुन् ।
