काठमाडौं। गायक तथा संगीतकार टंक बुढाथोकीको निर्देशन र निर्माणमा बन्न लागेको चलचित्र ‘मन बिनाको धन ठूलो कि धन बिनाको मन’ मा मुख्य कलाकारहरूको नाम सार्वजनिक गरिएको छ।
यो चलचित्रमा बाल गायक अशोक दर्जी मुख्य भूमिकामा रहनेछन्। दर्जीसँगै सरोज खनाल, नीता ढुंगाना, रमेश विश्वकर्मा, बुद्धि तामाङ, रवीन्द्र झा, एआर बुढाथोकी, शंकर श्रेष्ठ र साम्राज्ञी थापाले अभिनय गर्ने पक्का भएको छ। निर्देशक बुढाथोकीका अनुसार अन्य केही प्रमुख कलाकारहरूको छनोट प्रक्रिया जारी छ र छिट्टै टुंगो लगाइनेछ।
चलचित्रको कथा टंक बुढाथोकी आफैंले लेखेका हुन् भने पटकथा र संवाद शिवम अधिकारीले तयार पारेका छन्। चलचित्र छायांकनको जिम्मा सौरभ लामाले लिनेछन्। सामाजिक विषयवस्तुमा आधारित यो चलचित्रलाई बैंकटेश इन्टरटेन्मेन्टले वितरणको जिम्मा लिएको छ।
अशोक दर्जीले पहिलो गीत ‘मन बिनाको धन ठूलो कि धन बिनाको मन’ मार्फत चर्चा कमाएका थिए। गीतमा टंक बुढाथोकीको संगीत रहेको थियो, जसले अशोकको जीवनमा ठूलो परिवर्तन ल्यायो। हाल काठमाडौंमा कक्षा ८ मा अध्ययनरत अशोक दर्जीलाई टंक बुढाथोकीले अभिभावकत्व प्रदान गर्दै अध्ययनको अवसर दिएका छन्।
चलचित्र छिट्टै फ्लोरमा जाने तयारीमा छ। बुढाथोकीले यस चलचित्रमा पनि आफ्नै संगीत रहने जानकारी दिएका छन्।
