काठमाडौं । चलचित्र ‘पिताम्बर’ को एक्सनपूर्ण टिजर सार्वजनिक भएको छ । नयाँ वर्ष २०८२ को अवसर पारेर आगामी चैत २९ गतेदेखि प्रदर्शन हुने सिनेमाको राजधानीमा सोमबार आयोजित एक विशेष कार्यक्रममार्फत निर्माण टिमले टिजर सार्वजनिक गरेको हो ।
टिजरमा मुख्य कलाकारहरू प्रदीप खड्का, अनुपविक्रम शाही, दयाहाङ राई, सौगात मल्ल, सुरक्षा पन्त, सुपुष्पा भट्ट, दिव्या रायमाझी र रविन्द्र झाको उपस्थितिलाई देख्न सकिन्छ ।
दिव्य देवद्वारा महाभारतको उद्धरण ‘यदा यदा ही धर्मस्य’ बाट सुरु भएको सार्वजनिक टिजरमा विशेष गरी प्रदीप खड्का र सौगात मल्लको दमदार एक्सनलाई प्राथमिकता दिइएको छ । टिजरको एक संवादमा कलाकार रविन्द्र झाले “कथामा बहुत ट्विस्ट भयो, दुई वटा पिताम्बरको एउटै कथा छ” भन्ने वाक्यले फिल्ममा दुई पिताम्बरको कथा रहेको अनुमान लगाउन सकिन्छ ।
चलचित्रकी निर्देशक कृषा चौलागाईं ले प्रत्येक फिल्म फरक कथा बोकेको हुने बताउँदै ‘पिताम्बर’ मा पनि नयाँ कथा प्रस्तुत गरिएको खुलाइन् । उनले आफ्नो टिमले ठूलो क्यानभासमा उत्कृष्ट सिनेमा बनाएको र यो कुरा ट्रेलरले अझ स्पष्ट पार्ने बताइन् ।
नायक प्रदीप खड्काले एक्सनकै माध्यमबाट चलचित्रको कथा बोल्ने दाबी गर्दै टिजरमा फिल्मका मुख्य पक्षहरू झल्काइएको बताए । उनले निर्देशक कृषाको दृष्टिकोणले आफूलाई सिनेमाप्रति आकर्षित गरेको उल्लेख गरे।
निर्माता विशाल चौलागाईंले सिनेमा निर्माणप्रति आफ्नो रुचि र प्रतिबद्धता झल्काउँदै यो सिनेमाले नेपाली चलचित्र उद्योगमा नयाँ आयाम थप्ने विश्वास व्यक्त गरे ।
सिनेमामा नायिका सुरक्षा पन्त, सुपुष्पा भट्ट र दिव्या रायमाझीले आ–आफ्ना भूमिकामा भावनात्मक र चुनौतीपूर्ण चरित्र निभाएको बताइएको छ । बालकलाकारहरू आर्नव घिमिरे, प्रयुस दत्त सुवेदी, आध्य लामिछानेलगायतको समेत अभिनय रहेको छ ।
चलचित्रमा प्रदीप भारद्वाज र अभिमन्यु निरवीको पटकथा तथा संवाद, पुरुषोत्तम प्रधानको डीओपी, हिमाल केसीको द्वन्द्व निर्देशन, र आशीष अविरल तथा बाबुल गिरीको संगीत रहेको छ ।
आरआर फिल्म्स ले वितरण गर्ने ‘पिताम्बर’ मा नेपाली सिने उद्योगका बहुप्रतिक्षित कलाकारहरूको समावेशी अभिनय दर्शकहरूका लागि विशेष आकर्षण हुने अपेक्षा गरिएको छ ।
