काठमाडौं । निर्देशक दिवाकरकै कथा तथा लेखन रहेको चलचित्र ‘मायावी’को दोस्रो गीत सार्वजनिक भएको छ ।
महाशिवरात्रिको अवसर पारेर फागुन १४ गतेबाट प्रदर्शनमा आउन लागेको यस चलचित्रको दोस्रो गीत ‘टलटल टल्कियो’ सार्वजनिक गरिएको हो ।
यसअघि सार्वजनिक पहिलो गीत ‘त्यो माया हो’लाई दर्शकले सकारात्मक प्रतिक्रिया दिएका थिए । नयाँ गीत ‘टलटल टल्कियो’मा एसडी योगी र रेश्मा पुनले स्वर दिएका छन् । गीतको संगीत एसडी योगी स्वयंले गरेका छन् भने शब्द राम अविरल विष्टले लेखेका छन् ।
गीतको भिडियोमा पल शाह, दीपिका प्रसाईँ, समीम खान, करिश्मा श्रेष्ठ, र सुशील सिटौला सहितका कलाकारहरुको अभिनय देख्न सकिन्छ ।
कविराज गहतराजको कोरियोग्राफी रहेको भिडियोमा दीपिका र समीमको इन्गेजमेन्टका दृश्यसँगै पल शाहको भावनात्मक दृश्यले थप गहिराइ दिएको छ । चलचित्रको पहिलो गीतमा दीपिका र पलबीचको प्रेमलाई चित्रण गरिएको थियो ।
चलचित्र ‘मायावी’ प्रेम, मित्रता र वियोगको कथा प्रस्तुत गर्ने बताइएको छ । क्रियटिम सिने आर्ट्समा निर्माण भएको चलचित्रमा लक्ष्मी गिरी, प्रशान्त ताम्राकार, राजाराम पौडेल, अन्शु महर्जन, रवि डंगोल, राम प्रसाईं, दीपेन्द्र सिम्खडा र संगीता सिलवाल लगायतको पनि अभिनय रहेको छ ।
यो चलचित्रलाई ध्रुव न्यौपाने, राज कटुवाल र चन्द्र पन्तले निर्माण गरेका हुन् भने प्रवीण भट्टराई र करण सिंह कार्यकारी निर्माताका रुपमा छन् । सह-निर्मातामा मञ्जु भण्डारी, राजु पराजुली र सुमित ओली रहेका छन् ।
चलचित्रमा एसडी योगीसँगै शम्भुजित बाँस्कोटाले पनि संगीत दिएका छन् । शाहिल खानको ट्रेलर, राजु विक्रम थापाको छायांकन (डीओपी), र मिलन श्रेष्ठको सम्पादन रहेको छ ।
