चलचित्र ‘पिताम्बर’को टिजर सार्वजनिक भएको छोटो समयमा नै दर्शकहरूबाट शानदार प्रतिक्रिया पाएको छ।
नयाँ वर्ष २०८२ को अवसर पारेर रिलिज हुने चलचित्रको सोमबार सार्वजनिक गरिएको एक्सनप्रधान टिजरले २४ घण्टा नपुग्दै १० लाखभन्दा बढी दर्शकको ध्यान तानेको छ।
चलचित्रकी निर्देशक कृषा चौलागाईंले टिजरमा दर्शकहरूको सकारात्मक प्रतिक्रिया प्राप्त हुनु र यसरी नै छोटो समयमा धेरैले हेर्नु सिनेमा टिमका लागि हौसलाप्रद भएको बताइन्। दर्शकहरूले चलचित्रमा देखिएको प्रमुख कलाकारहरूको एक्सनलाई विशेष रुचाएका छन्।
केपी फिल्म्स र पुरुषोत्तम प्रधान फिल्म्सको ब्यानरमा निर्माण भएको यो सिनेमाका निर्माता विशाल चौलागाईं हुन्। चलचित्रमा प्रदीप खड्का, दयाहाङ राई, सौगात मल्ल, आर्यन सिग्देल, अनुपविक्रम शाही, सुरक्षा पन्त, गौरी मल्ललगायतका ख्यातिप्राप्त कलाकारहरूको अभिनय रहेको छ।
बालकलाकारहरूको रूपमा आर्नव घिमिरे, प्रयुस दत्त सुवेदी, आध्य लामिछाने, आरोह चौलागाईं र सुप्रोल बुढाथोकीले समेत अभिनय गरेका छन्।
चलचित्रको कथा र संवाद प्रदीप भारद्वाज र अभिमन्यु निरवीले लेखेका हुन् भने छायांकनमा पुरुषोत्तम प्रधान, शेरबहादुर लामा, र मानकृष्ण महर्जनले योगदान दिएका छन्। सिनेमामा आशीष अविरल र बाबुल गिरीको संगीत, हिमाल केसीको द्वन्द्व निर्देशन, र बन्दे प्रसादको सम्पादन रहेको छ।
आगामी चैत २९ गते रिलिज हुने चलचित्रको टिजरले यसअघि नै दर्शकहरूमा ठूलो उत्साह जगाएको छ। यो सिनेमालाई आरआर फिल्म्सले वितरण गर्दैछ।
