काठमाडौं । शहीद दिवसको विशेष अवसरमा नेपाली चलचित्र ‘एक्टर: टेक वन’ भोलि बुधबारदेखि सार्वजनिक प्रदर्शनमा आउँदैछ । यसअघि, सोमवार साँझ भक्तपुरस्थित क्युएफएक्स सिनेमाजमा चलचित्रको ग्रान्ड प्रिमियर सम्पन्न भएको छ ।
झकिझकाउ सेटमा आयोजित प्रिमियर शोमा करिब सात सय दर्शकको उपस्थिति रहेको थियो । कार्यक्रममा चलचित्रका मुख्य कलाकारहरू प्रदिप खड्का, राजबल्लभ कोइराला, अन्ना शर्मा, र दिव्या रायमाझीले रेड कार्पेटमा प्रवेश गर्दा सबैको ध्यान खिचे । प्रिमियरमा नेपाली चलचित्र क्षेत्रका कलाकारहरू, निर्माण टोलीका सदस्य, पारिवारिक सदस्य, तथा व्यापारिक क्षेत्रका प्रतिष्ठित व्यक्तित्वहरूको उल्लेखनीय उपस्थिति रहेको थियो ।
चलचित्र ‘एक्टर: टेक वन’का अभिनेता राजबल्लभ कोइरालाले १० वर्षपछि नेपाली चलचित्रमा पुनरागमन गरेका छन् । प्रिमियरमा सहभागी हुन उनी अमेरिका हुँदै नेपाल फर्किएका थिए । उपस्थितले कोइरालाको अभिनयको खुलेर प्रशंसा गरेका छन् ।
प्रिमियर शोमा सहभागी अधिकांश दर्शकले चलचित्रको कथावस्तु, प्रस्तुति, र कलाकारहरूको अभिनयको प्रशंसा गरे । अभिनेता तथा निर्देशक निश्चल बस्नेतले फेसबुकमा लेख्दै सिनेमाको उत्कृष्ट प्रदर्शन, चुस्त सम्पादन र साउन्ड मिक्सिङको तारिफ गरेका छन् । उनले ‘एक्टर: टेक वन’ले सुस्ताएको नेपाली चलचित्र बजारलाई तताउने विश्वास व्यक्त गरे ।
चलचित्र ‘एक्टर: टेक वन’को निर्देशन राजन भुसालले गरेका हुन् । यो उनको पहिलो निर्देशकीय चलचित्र भए पनि समग्र प्रतिक्रिया निकै सकारात्मक रहेको छ । सिनेमाको विषयवस्तुमा नयाँपन, कलाकारहरूको उत्कृष्ट अभिनय, र प्रस्तुतिमा ध्यान दिएको भन्दै भुसालको तारिफ भइरहेको छ ।
चलचित्रमा प्रदिप खड्का, अन्ना शर्मा, दिव्या रायमाझी, राजबल्लभ कोइराला, दिव्य देव, सृजना अधिकारी, उषा रजक, र सुशील सिटौलालगायतका कलाकारहरूको प्रमुख भूमिका रहेको छ । स्क्रिप्ट आकाश बराल र राजन भुसालले लेखेका हुन् । यो अधृत फिल्म्स् र अ मोती फिल्मको संयुक्त प्रस्तुति हो । चलचित्रका निर्माता थमन कुमार भण्डारी, क्रियटिभ प्रोड्युसर मोती कार्की र सह-निर्माता अनीश भुसाल हुन् ।
चलचित्रले प्रिमियरमा प्राप्त गरेको उत्साहजनक प्रतिक्रियाको आधारमा यसले नेपाली चलचित्र उद्योगमा नयाँ उचाइ कायम गर्ने अपेक्षा गरिएको छ । दर्शकले यसलाई कत्तिको रुचाउँछन् भन्ने प्रश्न माघ १६ गतेबाट सार्वजनिक प्रदर्शनपछि टुंगो लाग्नेछ ।
