फिल्म ‘कल्ली’को छायांकन आजबाट सुरु गरिएको छ। फिल्मको पहिलो दृश्य काठमाडौंको बौद्धस्थित एक घरमा खिचिएको छ। केही दिन काठमाडौंमा छायांकन गरेपछि टिम जुम्ला प्रस्थान गर्ने छ।
३५ दिन लामो सेड्यूलसहित निर्देशक लक्ष्मण सुनारले फिल्मको छायांकन सुरु गरेका हुन्। पहिलो दिन नायक नाजिर हुसेन, नायिका वर्षा राउत, तथा चर्चित कलाकार उत्तम प्रधानको दृश्य खिचिएको छ।
लेकाली इन्टरटेन्मेन्ट र कस्तूरी प्रोडक्सनको ब्यानरमा निर्माण भइरहेको यो फिल्ममा हिमाल कडरिया र अमलादेवी राईको लगानी रहेको छ भने महेश दवाडीको लेखन रहेको छ। फिल्मका कार्यकारी निर्माता सरोज नेपाली हुन्।
फिल्ममा सौगात मल्ल, अर्पण थापा, बेनिशा हमाल, विनोद न्यौपाने, रेयर राई, प्रियना आचार्य, गीता अधिकारी, कुलदिप अधिकारी, बेगम नेपाली लगायतका कलाकारको अभिनय रहनेछ। फिल्मका प्रस्तुतकर्ता किरण नेपाली हुन् भने छायांकन निसाल पौडेलले गरिरहेका छन्।
१३ वर्षपछि फिल्म क्षेत्रमा पुनरागमन गर्न लागेका अभिनेता उत्तम प्रधान निकै उत्साहित देखिएका छन्। उनले भने, ‘यो फिल्मको कथावस्तु मलाई निकै मन पर्यो। मैले यसअघि गरेका फिल्मभन्दा फरक भूमिका भएकाले काम गर्न लागेको हुँ। यसबीचमा धेरै फिल्मको अफर आए पनि मन पर्ने भूमिका नपाएकाले काम गरेको थिइनँ।’
सुटिङ सेटमा भेटिएका नायक नाजिर हुसेन र नायिका वर्षा राउतले आफूहरू श्रीमान्–श्रीमतीको भूमिकामा देखिन लागेको बताएका छन्। फिल्मको प्रदर्शन मिति भने तय गरिएको छैन।
