चलचित्र ‘माग्ने राजा’को प्रदर्शन मिति तय गरिएको छ । छायाकंनमा जानू अगावै यो सिनेमाको आगामी वर्षको हरितालीका तीजलाई रिलिज मिति घोषणा गरिएको हो ।
चलचित्रको मुख्य भूमिकामा केदार घिमिरे ‘माग्ने बुढा’, अभिनेता आर्यन सिग्देल, अभिनेत्री वर्षा शिवाकोटी, कलाकार विल्सनविक्रम राई, मिस पवि, शिशिर बाङदेलको अभिनय रहने छ ।
चलचित्र ‘माग्ने राजा’मा माग्ने बुढा र तक्मे बुढाको जुगलबन्दी करिब दश वर्षपछि सँगै काम गर्न लागेका हुन् । एक दशकअघि उनीहरू ‘राम कहानी’मा सँगै काम गरेका थिए ।
विल्सन विक्रम राईलाई ‘मेरी बास्सै’मा अभिनयको मौका दिनुका साथै उनको चरित्रलाई तक्मे बुढा नामाकरण पनि केदार घिमिरेले नै गरिदिएका थिए ।
ऋषि लामिछानेको निर्देशनमा बन्न लागेको चलचित्रमा सामीप्य राज तिमल्सेनाको पटकथा रहेको छ ।
आरम्भ प्रडक्सनको प्रस्तुतिमा निर्माण हुन लागेको चलचित्रमा नरेन्द्र मैनालीको छायांकन रहेको छ ।
करिब ३ करोडको लागतमा निर्माण हुन लागेको यो फिल्मलाई कलाकार समेत रहेका निर्माता एवं हाल दाङको घोराही उपमहानगरपालिका–४ को वडाध्यक्षका रूपमा समेत चिनिएका मुनाल घिमिरेले निर्माण गर्न लागेका हुन् ।
चलचित्रको छायांकन यही शिवरात्रीका दिनदेखि सुरु हुँदैछ ।
