काठमाडौं । चलचित्र ‘आउट लः दफा २१९’ को ट्रेलर सार्वजनिक भएको छ । होलीको अवसर पारेर यही फागुन २९ गतेबाट रिलिज हुन लागेको यो सिनेमाको ट्रेलरले दर्शकको उत्सुकता ह्वात्तै बढाउने देखिन्छ ।
एक्सन र सस्पेन्स पर्याप्त देखिएको ट्रेलर मोस्ट वान्टेड क्रिमिनल’ घोषणा गरेको एक पात्रको वरिपरि घुमेको देखाइएको छ ।
ट्रेलर हेर्दा यो चलचित्रको मेकिङ, कथावस्तु, एक्सन गज्जब देखिएको छ । सिनेमामा एक्सनलाई फरक शैलीमा प्रस्तुत गरिएको निर्माणपक्षको भनाइ छ । यो चलचित्र अभिनेता सुशील श्रेष्ठको ५ वर्षपछिको कमब्याक सिनेमा हो ।
विक्की महर्जनको लेखन तथा निर्देशन रहेको चलचित्रमा सुशीलका अलावा नरेश पौडेल, शिक्षा संग्रौला, सुमन भण्डारी, हेम गुरुङ, सोनी लागुन, विशाल पहारीलगायत कलाकारको अभिनय छ ।
अमित अग्रहरि र निशा गुइडेको लगानी रहेको चलचित्रमा विनोद कठायत कार्यकारी निर्माता छन् । विकास चौधरी सह–निर्माताको रूपमा छन् ।
स्याडो पिक्चर्स तथा रेट्रो फिल्मस्को ब्यानर निर्माण भएको चलचित्रमा नवीन गुरुङको डीओपी, चुल्ठे काजीको एक्सन निर्देशन, साहिल खानको सम्पादन छ ।
