काठमाडौं । गायक तथा अभिनेता प्रकाश सपूतको पहिलो निर्देशकीय चलचित्र ‘वसन्त’को नयाँ गीत सार्वजनिक भएको छ ।
झाँक्री भाकामा आधारित ‘बिना स्वादैको’ बोलको यस गीतमा देवेन्द्र बब्लु (दि फिरन्ते)को स्वर तथा परिकल्पना रहेको छ । यस गीतमा गायक तथा निर्देशक प्रकाश र देवेन्द्रको संगीत रहेको छ भने संगीत संयोजन योगेश काजी शाहको छ ।
आगामी चैत्र २२ गते प्रदर्शनमा आउने तयारीमा रहेको चलचित्रको सार्वजनिक गीतको भिडियोमा सिनेमाका मुख्य कलाकार प्रभात पाल ठकुरी, श्री शिभान्सी, गायक देवेन्द्र बब्लु, मुख्य सहायक निर्देशक सुनिल विक र कलाकार विशाल पहारी प्रस्तुत छन् ।
यो चलचित्रले विपन्न विश्वकर्मा समुदायका एक युवकको लेखक बन्ने सपना पूरा गर्न गरेको संघर्षको कथा प्रस्तुत गर्छ । हरर रोमान्टिक थिममा तयार पारिएको सार्वजनिक उक्त गीतमा अन्तरजातीय प्रेम र त्यसपछि परिवारले गर्ने मोहनी फुकाउने घटनाक्रम देखाइएको छ ।
भिडियो हेर्दा शिभान्सीको प्रेममा डुबेका प्रभातलाई मोहनी लागेको आशंकामा परिवारले घरमा झाँक्री बसालेको कथावस्तु प्रस्तुत गरिएको छ ।
चलचित्र ‘वसन्त’मा प्रकाश सपूतका साथै स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे, खड्क बहादुर पुन (खबपु), अनुप बराल, कमलमणी नेपाल, प्रकाश घिमिरेलगायतका कलाकारको अभिनय रहेको छ ।
गलबन्दी प्रोडक्सनको ब्यानरमा निर्माण भएको यो सोसल ड्रामा सिनेमाको कथा, पटकथा र संगीत प्रकाश सपुतले नै तयार पारेका हुन् ।
सिनेमाका निर्मातामा मोहन विश्वकर्मा र बिन्दु बोहोरा छन् भने कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ रहेका छन् ।
बागलुङ, काठमाडौं र तराईका विभिन्न स्थानमा छायांकन गरिएको सिनेमाका छायाकार सुसन प्रजापति हुन् । यो चलचित्रलाई काठमाडौं उपत्यकामा डिसिएन र मोफसलमा एफडी कम्पनीले वितरण गर्नेछन् ।
