काठमाडौं । आगामी बैशाख २६ गते प्रदर्शन हुने चलचित्र ‘जार’को पहिलो गीत सार्वजनिक गरिएको छ । सौगात मल्ल र अनुपविक्रम शाही मुख्य भूमिकामा रहेको यो सिनेमाको ‘ए ठुली’ बोलको गीत सार्वजनिक गरिएको हो ।
फेरी टेल पिक्चर्सले निर्माण गरेको यो चलचित्र साहित्यकार इन्द्रबहादुर राईको ऐतिहासिक कथामा आधारित छ । सन् १८ सयको दशकमा नेपाली समाजमा घटेको यथार्थ घटनालाई सिनेमाले बोल्नेछ ।
अभिनेता सौगात मल्ल र अभिनेत्री गीताञ्जली थापा फिचर्ड सार्वजनिक गीतको भिडियोमा उनीहरुबीचको प्रेम र आकर्षणलाई उतारिएको छ । यसले तत्कालिन समाजको परिवेश सुहाउँदो प्रस्तुति चित्रण गरेको छ ।
सार्वजनिक गीतमा समावेश संगीत, शब्द र दृश्यले सयौँ वर्ष पुरानो नेपाली समाजको प्रतिनिधित्व गर्छन् । ‘ए ठुली’मा झुमा लिम्बु र पवन गिरीको स्वर समावेश हुँदा हर्क साउदको शब्दमा संगीत एरेञ्जको काम गंगा थापाले गरेका छन् । मिक्सिङ र मास्टरिङ विश्व शाहीको छ ।
गीताञ्जली थापा ‘लायर्स डाइस’बाट भारतीय राष्ट्रिय सिनेमा पुरस्कार विजेता अभिनेत्री हुन् । नेटफ्लिक्स सिरिज ‘सेक्रेड गेम्स’मा पनि गीताञ्जलीले अभिनय गरेकी छिन् ।
गीताञ्जली अभिनित सिनेमा टोरन्टो, बुसान, लस एन्जलस, न्युयोर्क लगायतका विश्व चर्चीत फिल्म फेस्टिभलमा स्क्रिनिङ भइसकेका छन् ।
फूर्वा छिरिङ लामाको निर्देशनमा निर्माण भएको सिनेमाको सम्पूर्ण छायांकन सिक्किममा गरिएको छ । होप रिल्स, एलए सेभेन सट्र्स, बराल स्टुडियो र किवा प्रोडक्सनको सहकार्यमा निर्माण भएको सिनेमाको कार्यकारी निर्मातामा त्रिलोचन पाण्डे, नीरज राई, नुर्साङ भुटिया, ज्योती क्षेत्री र पेमा रिन्जिङ लेप्चा छन् ।
नेपाल र भारतसहित अन्तर्राष्ट्रिय बजारमा सिनेमालाई एकसाथ प्रदर्शनमा ल्याउने निर्माण टिमले बताएको छ ।
यो सिनेमाले सन् १८ सयको दशकतिर नेपाली समाजमा घटेको एक यथार्थ घटनालाई देखाएको छ । सरवानन इलावार्सुको छायांकन रहेको सिनेमामा अखिलेश राईको सम्पादन छ ।
