गत वर्षको भदौ १० गते रिलिज भएको चलचित्र ‘द सेक्रेट अफ राधा’ आगामी भदौ २९ गते पुनः रिलिज हुने भएको छ ।
रिलिज भएर हल नपाएको भन्दै निर्देशक सुवर्ण थापा र उनको टिमले गतबर्ष पत्रकार सम्मेलन गर्दै ‘राधा’ चलचित्रलाई आफूहरुले हलबाट उतार्ने निर्णय लिएको घोषणा गरेका थिए ।
बक्स अफिसमा असफल भएको यो चलचित्रलाई यो बर्ष पुनः रिलिज गर्ने तयारीमा यसका निर्देशक सुवर्ण थापा लागि परेका छन् । चलचित्र नेपालका हलमा तीजको अवसर पारेर भदौको २९ गतेबाट फेरी रिलिज हुने उनको भनाई छ ।
यो चलचित्रसँगै गतबर्ष ‘प्रकाश’ र बलिउड फिल्म ‘लाइगर’ एकसाथ रिलिज भएका थिए । त्यसो त अघिल्लोपटक नै हल नपाएको भन्दै उतारिएको चलचित्रलाई यो बर्ष किन अरु ३ वटा चलचित्र रिलिज हुने मितिमा ल्याउने तयारी सुवर्णले गरेका छन् ।
यो मितिमा पहिले नै चलचित्र ‘नांगो गाउँ र भगवत् गीता’ आउने घोषणा गरिसकेका छन् । यस्तै, अर्को चलचित्र ‘अैँचो पैँचो’लाई पनि यही मितिमा ल्याउने तयारी गरिएको छ ।
निर्देशक सुवर्ण थापा र सौगात मल्ल निर्माता रहेको यस चलचित्रमा सृष्टि श्रेष्ठ, खगेन्द्र लामिछाने, सौगात मल्ल, बुद्धि तामाङ, मेनुका प्रधान, दिव्य देवको अभिनय छ । यसै चलचित्रबाट सौगातले चलचित्र निर्माणमा हात हालेका हुन् ।
