बलिउड अभिनेता विवेक ओबरायले तेश्रो पटक नेपालको प्रधानमन्त्रीमा नियुक्त भएका प्रचण्डलाई बधाई दिएका छन् । उनले सामाजिक संजालमा प्रचण्डसँग केही दिन अगाडि नेपाल भ्रमणको भेटका तस्वीर पोष्ट गर्दै बधाई दिएका हुन् । नेपाल जस्तो सुन्दर देशको प्रधानमन्त्री भएकोमा उनले बधाई लेखेका छन् ।
बिबेक शनिबार मात्र नेपालको १० दिनको भ्रमण सकेर भारत फर्र्किएका थिए । नेपाल आएकै दिन उनले प्रचण्डसँग खुमलटारमा भेट समेत गरेका थिए । बिबेकले सो दिनको स्मरण गर्दै प्रचण्डबाट पाएको न्यानो आतिथ्यताका लागि पनि धन्यवाद दिएका छन् ।
उनले, भेटका क्रममा प्रचण्डले देखाएको आतिथ्यताले नेपालको संकृति झल्कने पनि उल्लेख गरेका छन् ।
ओबराय लेख्छन्, ‘बधाई छ कमरेड प्रचण्ड । तेस्रो पटक सुन्दर नेपालको प्रधानमन्त्रीमा निर्वाचित हुनुभएकोमा । भर्खरै तपाईंसँगको भेटले सम्मानित महसुस गरायो । तपाईंले हामीलाई गर्नुभएको न्यानो माया र स्वागतले नेपालको विनम्रता र सांस्कृतिक करुणलाई झल्काउँछ ।’
नेपालको पर्यटन प्रवर्द्धन गर्न भन्दै १० दिने नेपाल भ्रमणमा आएको बेला प्रचण्डलाई भेट्न ओबराय मंसिर २९ गते खुमलटार पुगेका थिए । बिबेकले पशुपतिनाथको दर्शन गर्नुको साथै लुम्बिनी, पोखराको समेत भ्रमण गरेका थिए ।
