दिपेन्द्र के खनाल निर्देशित ‘आमा’ सहित अर्पण थापा निर्देशित ‘घर’ तथा ‘तीन जन्तु’ मा सहनिर्माता बनेर सिनेमा निर्माणमा सक्रिय रहिरहेका पोखराका युवा सन्तोष अधिकारीले आफूले अभीनयमा डेब्यू गर्न लागेको सिनेमा ‘चित्रा’ को पहिलो गीत रिलिज कार्यक्रममा यस्तो तीतो प्रश्नको सामना गरे।
तपाईं पैसा हालेर हिरो बन्न आउनु भएको हो ?
यो प्रश्न उनका लागि अपेक्षाकृति थियो तर उनको नेपथ्यको जानकारी भएको भए सायद यसको उत्तर उनले दिनुपर्थेन होला।
पोखरामा जन्मिएर अष्ट्रेलियामा कर्म गरिरहेका सन्तोष थुप्रै इभेन्टका आयोजक हुन्। उनले नेपालसँगै अष्ट्रेलियामा थुप्रै फेसन शो सहितका इभेन्टहरु गरिसकेका छन्। उनले यसैका लागि एएसएपी नाम कम्पनी दर्ता गरेर काम गरिरहेका छन् । समीक्षकीय रुपमा तारिफ बटुलेको ‘आमा’, ‘घर’ लगायतका सिनेमाको सह निर्मातासहित रहिसकेका सन्तोषले ‘पैसा हालेर हिरो बनेको ?’ भन्ने प्रश्नलाई सहज लिए।
‘मैले कसैको निर्माण कम्पनीमा गएर मेरो पैसा यति छ, त्यो तपाईंहरुलाई दिन्छु, कृपया हजुरको फिल्ममा मलाई रोल दिनु भनेर काम गरेको छैन । त्यसलाई चाहिँ पैसा हालेर फिल्म खेलेको भनिन्छ,’ उनले भने ।
उनी अभिनित तथा घनश्याम लामिछाने निर्देशित ‘चित्रा’ पौष २७ गते रिलिज हुँदैछ। फिल्मबाट उनी आशावादी छन्।
उनी हुन त पैसा भएका मानिस हुन तर लहड, रहर र पैसाको बलमा फिल्म खेल्न आएका हैनन्। उनले यसका लागि पर्दामा पैसा हालेको कलाकार भन्दा पनि कलाकार देखिउँ भन्नका लागि मात्र नभई तयारी गरेरै आएका हुन्।
‘जुन तपाईंहरुले मेरो विगत हेर्नुभएको छ भने थाहा पाउनु हुन्छ । घर, आमा, तीन जन्तु लगायत फिल्म बनाएको छु । ति फिल्ममा मरो कुनै पनि रोल देख्नु भएको छ । मैले जुन हिसाबले लगानी गरे मिन भने पेशा अनुरुप अस्याप इन्टरटेन्मेन्टबाट त्यहाँ गरेर निर्माता भएको हुँ । अब अभिनय मार्फत आउँदैछु । सबैको माया पाउनेमा विश्वस्त छु’, उनले आत्मविश्वासका साथ भने ।
विदेशबाट फर्किएपछि सन्तोषले अस्याप इन्टरटेन्मेन्ट दर्ता गरे । कम्पनी दर्ता गरेपछि केही इभेन्टहरुसँगै केही म्युजिक भिडियो गरे। उनले जति पनि म्युजिक भिडियोहरु गरे ती उनका लागि अभिनयका कक्षाहरु थिए। यसक्रममा उनले क्यामेरा एङ्गल, फेस फ्रन्ट, क्यारेकटर के कतिको सुहाउँछ ? आदि इत्यादी सिके।
यी सबै सिकाइ उनका लागि एउटा तयारी थियो, पूर्वाअभ्यास, परिक्षा अघिको पढाइजस्तै ।
उनलाई कम्पनी चलाउँदैमा त्यो चलाउने व्यक्तिले अभिनय गर्नुहुँदैन भन्ने कुरामा विश्वास गर्दैनन्। क्षमता छ भने किन नगर्ने ? उनी प्रश्न गर्छन् ।
‘मेरै कम्पनीमा विभिन्न डिपार्टहरु छन् सबैमा मेरो दख्खल पुग्दैन, त्यहाँ मैले त्यसका लागि सक्षम व्यक्ति राखेको छु। उनीहरुले आफ्नो जेमा दख्खल छ त्यो गर्छन् र म पनि आफूले जानेको कुरा गर्छु, अभिनय पनि मैले सक्षम भएरै गरेको हुँ।’
उनी अष्ट्रेलियाको सिड्नी थिएटर स्कुलका विद्यार्थी हुन्। उनले त्यही नै आफ्नो अभिनयको कखरा सिके, त्यहाँको अण्तराष्ट्रिय सिकाइले उनलाई ‘चित्रा’ गर्ने आत्मविश्वासको जरा हालिदिएको हो, अब उनी त्यस्मा बलियो गरी खडा हुने सोचमा छन्।
अहिले उनी धेरै बोल्नुभन्दा पनि कामले बोल्ने दिनको प्रतिक्षामा छन्।
‘चित्रा’मा सन्तोष भन्दा पनि अरु मानिसहरुको लगानी छ । उनीहरुले उनीमाथि विश्वास भएरै लगानी गरेका हुन्।
उनलाई खहरे जस्तो क्षणिक हुनु छैन्, सेती नदीजस्तो अभिनय र सिनेमा निर्माणमा निरन्तर र गहिरो बग्नु छ। यसका लागि उनलाई ‘चित्रा’ रिलिजको प्रतिक्षा छ, किनकी रिलिज पछि नै उनीमाथि उठेका प्रश्नहरुले उचित जवाफ पाउनेछन्। अहिले उनी त्यही समय पर्खिरहेका छन्।
‘चित्रा’ले बाबु र छोरीको कथालाई सूक्ष्म रुपमा उठान गर्छ। सामाजिक कथामा एक्सन र ड्रामालाई प्रस्तुत गरिएको छ । फिल्मले हरेक घरको कथा भन्ने सन्तोष बताउँछन्। हरेक घरको कथा भएकाले दर्शकले यसलाई माया गर्नेमा उनी ढुक्क छन्।
‘चित्रा’मा सन्तोषसँगै मेनुका प्रधान, शुभेच्छा खड्का, अर्पण थापा, प्रमोद अग्रहरी, प्रकाश घिमिरे, अन्जना बराइली, सिम्रन खड्का, आयुशी ढकाल, विनोद पौडेल, कपिल शर्मा, कुमार गुरुङ, उज्वल ढकाल, दिपेश गजुरल लगायतका कलाकारको अभिनय छ ।
चित्राका निर्माता आशिष थापा मगर हुन् भने सन्तोष आफै कार्यकारी निर्मातामा रहेका छन् । अजय अधिकारीको कथा र मनिष गौतमको पटकथा रहेको यस फिल्ममा राजनराज शिवाकोटीको संगीत छ भने स्वरमा उनलाई गायिका मिलन अमात्यले साथ दिएकी छिन् ।
महेश पौडेलले छायाँकन गरेको फिल्ममा सम्पादनको भूमिकामा बनिश शाह र सन्देश शाह रहेका छन् ।
सन्तोष अधिकारी फिल्म्सको व्यानर एवम् अस्याप इन्टरटेन्मेन्ट नेपाल र अस्ट्रेलियाको निर्माणमा तयार भएको फिल्मको नेपालभरको वितरणको जिम्मा केदार पराजुलीको श्री कृष्ण फिल्म्सले लिएको छ। फिल्मको अष्ट्रेलियाको अधिकार अविनास रोका मगरले लिएका छन् ।
