गतबर्ष रिलिज भएको फिल्म ‘के घर के डेरा’को सिरिज निर्माण हुने भएको छ ।
निर्देशक दीपेन्द्र के खनालले आफ्नो निर्देशनमा बन्न लागेको नयाँ फिल्म ‘के घर के डेराः घर नम्बर २’ निर्माणको घोषणा गरेका हुन् ।
यो फिल्मलाई चर्चित लेखक बुद्धिसागर लेखेका छन् । फिल्मको कथा लगभग फाइनल भइसकेको निर्देशक खनालले जानकारी दिए ।
फिल्मको प्रदर्शन मिति समेत तय गरिएको छ । यो फिल्मलाई आउँदो बर्षको तिहारमा रिलिज गर्ने घोषणा निर्माणपक्षले गरेको छ । ए प्लस इन्टरटेन्मेन्टसँग नटराज क्रियशनले सहकार्य गर्दै यो फिल्मको निर्माण गर्न लागेको हो ।
फिल्म ‘के घर के डेराः घर नम्बर २’ले मनोरञ्जन मात्र नभएर गहन कथालाई बोल्ने निर्देशक खनालको भनाई छ ।
निर्देशक खनालले यो चलचित्रको छायांकन अगाडि २ वटा फिल्मको छायांकन सक्नेछन् । उनले, तत्काल फिल्म ‘मेयर’को छायांकन सुरु गर्नेछन् । यसपछि, उनले आफ्नै होम प्रोडक्शनको एक फिल्म निर्देशन गर्ने तयारी गरेका छन् ।
दीपेन्द्रले आउँदो बर्ष फिल्म ‘पशुपति प्रसाद ३’को पनि निर्देशन गर्दैछन् । यसरीहेर्दा, उनको हातमा ४ वटा फिल्मको लाइनअप छ ।
