अभिनेता विल्सन विक्रम राई ‘तक्मे बुढा’को डेब्यु निर्देशकीय फिल्म ‘लाउरे एण्ड दाउरे’मा कलाकारहरू भित्रिने क्रम बढ्दै गएको छ ।
फिल्मको मुख्य भूमिकामा यसअघि नै दयाहाङ राई र बुद्धि तामाङ अनुबन्धित भइसकेका थिए।
यतिबेला ‘लाउरे एण्ड दाउरे’मा कलाकार विजय बराल पनि अनुबन्धित भएका छन् । निर्माण टिमले बुधबार विजयसँग सम्झौता गरेको हो ।
सम्झौतासँगै फिल्ममा विजयको लुक्ससहितको तस्वीर सार्वजनिक गरेको छ । विजयको प्रवेशसँगै फिल्ममा कलाकारको लाइनअप पनि बलियो बन्दै गएको छ ।
विल्सनका अनुसार विजय यो फिल्ममा अहिलेसम्मकै फरक भुमिकामा देखिने छन् । तर उनको भूमिकाबारे विल्सनले केही खुलाएनन् । फिल्ममा अभिनय गर्ने मुख्य अभिनेत्री र अन्य कलाकार केही समयमा टुङ्गो लाग्ने निर्माण टीमले जनाएको छ ।
कमेडी र लभस्टोरीको कथावस्तुमा निर्माण हुन लागेको फिल्मको लेखन विल्सन स्वयंले गरेका छन् ।विल्सनकै निर्माण कम्पनी तक्मे प्रोडक्सनले फिल्म बनाउन लागेको हो ।
यसअघि केही प्रोजेक्ट बनाउन अन्य ब्यानरसँग सहकार्य गरेको तक्मे प्रोडक्सनले ‘लाहुरे एण्ड दाउरे’को निर्माण भने एक्लै गर्नेछ । फिल्मको निर्मातामा सरिना लामा छिन् । फिल्मको संगीत अनमोल गुरुङले गर्नेछन् ।
