अभिनेता पल शाह कारागारमा छन् । एक नाबालिका गायिकालाई बाल यौन दुरूपयोगको आरोपमा नवलपुर अदालतले २ वर्ष ६ महिनाको जेल सजाय सुनाएपछि विगत ११ महिनादेखि तनहुँ जिल्ला कारागारमा सजाय काटिरहेका छन् ।
तनहुँ जिल्ला अदालतमा चाहिँ पटक–पटक स्थगित हुँदै आएको पलविरुद्धको जबरजस्ती करणीको मुद्दाको सुनुवाइ आगामी माघ ३ गतेलाई पेशी तोकिएको छ । आगामी फागुनमा पल शाहले जेल जीवन विताएको एक वर्ष पुग्दैछ । यता, पल रिहा भएपछि फिल्म कमब्याक गर्ने भन्दै ‘ओ सजन’ घोषणा गरिएको छ । पलको अदालतबाट फैसला नआउँदै निर्माताले चलचित्र बनाउन अनुमति लिएका हुन् ।
पललाई लिएर चलचित्र बनाउने भन्दै उनी नजिककी साथी कविता रायले चलचित्रको घोषणा गरेकी हुन् । पल र कविताको मुख्य भूमिका रहने भनिएको यो चलचित्र हिजो शुक्रबार चलचित्र विकास बोर्डमा दर्ता गरिएको छ ।
शिवम अधिकारीको लेखन तथा निर्देशनमा बन्न लागेको चलचित्रको बोर्डबाट राया फिल्म्स प्रा.लि.ले पलको मुख्य भूमिका हुने गरि फिल्म ‘ओ सजन’ निर्माणको इजाजतपत्र लिएको हो ।
चलचित्रका लागि पलले कानुनी झमेलामा पर्नु अगाडि नै संझौता गरेका थिए । हुन् त, पलले कारागारभित्रै केही चलचित्रको स्क्रिप्ट पढ्दै गरेको खबर यसअघि नै सार्वजनिक भइरहेका थिए । तीनवर्षभित्र चलचित्र निर्माण गर्ने गरि निर्माताले अनुमति लिएको देखिन्छ ।
पल जेलबाट बाहिरिएपछि ‘ओ साजन’ खेल्ने शिवमले दाबी गरे । पल, जेलबाट कहिले निस्केलान् भनेर तपाइहरुले चलचित्रको घोषणा गर्नुभएको हो भन्ने प्रश्नमा शिवमले भने, ‘हामीले साढे २ बर्षकै हिसाब गरेर चलचित्रको तयारी गरेका हौं । अहिले कथामा काम भैरहेको छ ।’
चलचित्रमा पल र कवितासँगै आरएल लामा कलाकारको प्रमुख भूमिका रहने छ । उनीहरुले यसअघि ‘ओ सजन’ बोलको थारु गीतमा काम गरिसकेका छन् । चलचित्रको बजेट १ करोड रुपैयाँ तय गरिएको छ । चलचित्रमा नरेश योगीको गीत रचना छ ।
गत महिना अर्का निर्माता किरण नेपालीले पनि कारागार पुगेर पललाई भेटेपछि उनलाई लिएर चलचित्र बनाउने बताएका थिए । यता, नवलपुर अदालतको फैसलाविरुद्ध पलले उच्च अदालत पोखरामा पुनरावेदन दिइसकेका छन् ।
