फिल्म ‘घरज्वाइँ’ निर्माण टिमले प्रचार प्रसारको सुरुवात गरेको छ । शनिबार अर्थात् असार १ गतेबाट टुँडिखेलमा सुरु भएको मगरहरुको महान पर्व भूमेको अवसर पारेर फिल्मको प्रचार थालिएको निर्माता जनक घर्तीमगरले बताए ।
शनिबार भूमे पर्वको शुभारम्भ नेपाल सरकारका माननिय अर्थमन्त्री वर्षमान पुनले गरेका थिए । सोही कार्यक्रममा सहभागी हुन ‘घरज्वाइँ’ टिमका तर्फबाट अभिनेता दयाहाङ राई, अभिनेत्री मिरुना मगर, निर्देशक अनिल बुढामगर, कलाकार शिशर वाङ्देल, भोलाराज सापकोटा लगायत टुँडिखेल पुगेका थिए ।
फिल्मको कार्यक्रममा बोल्दै अभिनेता दयाहाङ राईले नेपाल बहुल जाति र भाषिक देश भएकाले एकअर्काको संस्कार र संस्कृति बुझ्न जरुरी भएको बताए । आफू भोजपुरमा जन्मिएको राईको छोरो भएपनि पूर्वी रुकुमको एक मगर युवाको जीवन फिल्ममा बाँच्न पाएको र आफूले यो कारेक्टरलाई न्याय दिने दिलोज्यान लगायकाले सवैलाई मन पर्ने विश्वास व्यक्त गरेका थिए । यो फिल्म मगर समुदायमा आधारित भएतापनि सम्पुर्ण नेपाली फिल्मप्रेमी दर्शकलाई मन पर्ने बताए ।
फिल्मकी मुख्य अभिनेत्री मिरुना मगरले आफू सानैमा विदेश गएकाले पनि मगर संस्कार र संस्कृतिलाई नजिकबाट बुझ्न पाएको थिइन् । ‘घरज्वाइँ’ले आफुलाई यो अवसर जुराएको भन्दा निर्माता जनक घर्तीमगर र निर्देशक अनिल बुढामगरलाई धन्यवाद दिइन् ।
मिरुनाले आफू पूर्वेली मगर भएकाले पनि पश्चिमको संस्कार र संस्कतिको बारेमा बुझ्ने इच्छा थियो । यो अवसर ‘घरज्वाइँ’ले जुराएको छ । आफूले सिनेमाको पात्रको रुपमा आफ्नो संस्कार र संस्कृतिलाई देश तथा विदेशमा चिनाउने अवसर पाएकोमा खुशी व्यक्त गरिन् ।
यस्तै भूमे पर्वमा प्रमुख अतिथिको रुपमा उपस्थित नेपाल सरकारका अर्थमन्त्री वर्षमान पुनले पनि फिल्मले दर्शकको मन जित्ने विश्सास व्यक्त गरेका थिए । निर्देशक अनिल र निर्माता जनकले लामो समयदेखि आफुहरुले यस्तो खालको फिल्म निर्माण गरिरहेको र सो फिल्ममा दयाहाङ र मिरुनालाई अभिनय गराउने कुरा गदाई आफूले नपत्याएको समेत बताए ।
‘‘आज आफ्नै अगाडी दयाहाङ र मिरुना फिल्म प्रचारको लागि आएको देख्दा निकै खुशी लागेको भन्दै दुवै जना भर्सटायल कलाकार रहेकाले आगामी दिनमा अझै सफलताको मेरो तर्फबाट दिन चाहान्छु’’, अर्थमन्त्री पुनले भने, ‘‘केही समयअघि दयाहाङ जी जारी फिल्ममा लिम्बु समुदायको प्रतिनिधि पात्र भएर मिरुना जीलाई तान्दै हुनुहुन्थ्यो । अहिले हामी मगर समुदायको घरज्वाइँ बन्नु भएको छ । आगामी दिनमा हरेक नेपाली समाजलाई जोड्ने फिल्ममा अभिनय गर्दै जानु होला मेरो शुभकामना छ ।’’
जिएम मूभीज र एबीएम सिनेमा प्रोडक्सनको ब्यानरमा निर्माण भएको फिल्मलाई सुसन प्रजापतिले खिचेका हुन । पूर्वी रुकुम आसपासमा छायांकन गरिएको फिल्मको कथा पनि निर्देशक अनिल आफैले लेखेका हुन् । उनलाई पटकथा तथा संवाद लेखनमा भने बिनोद खतिवडा र सुभाष कोइरालाले सघाएका छन् ।
असार २८ गते प्रदर्शनमा आउने ‘घरज्वाइँ’मा दयाहाङ र मिरुनाका अलवा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन, राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरले अभिनय गरेका छन् ।
फिल्मका गीतमा हर्क साउद र मनोज थापाको शब्द तथा संगीत छ । कृष्ण भन्डारीले सम्पादन गर्ने फिल्मको डिजिटल पार्टनर बुढा सुब्बा डिजिटल हो ।
