फिल्म ‘फेरि रेशम फिलिलि’को छायांकन सुरु भएको छ । निर्माणपक्षले आज एक विशेष कार्यक्रमको आयोजना गर्दै शुभमुहूर्तसँगै छायांकन कार्यको आरम्भ गरेको हो ।
यो फिल्मको औपचारिक घोषणा भने शुक्रबार गरिएको थियो ।
फिल्मका निर्माता रौनक विक्रम कडेलले छायांकन आजबाटै सुरु भएको जानकारी दिएका छन् । यो फिल्मको लेखन र निर्देशन निरोज महर्जनको रहेको छ ।
‘फेरि रेशम फिलिलि’मा कलाकारहरूको बलियो टिम रहेको छ । प्रमुख कलाकारमा विनय श्रेष्ठ, कामेश्वर चौरसिया, सुपुष्पा भट्ट, नीर शाह, रवीन्द्र झा, प्रकाश घिमिरे, लक्ष्मी गिरी, महेश त्रिपाठी र एलनराज उप्रेती रहेका छन् ।
सुरज बम ठकुरी कार्यकारी निर्माता रहेको फिल्मका सह-निर्माता एनी थापा हुन् । फिल्म सिनेमा आर्टसको प्रस्तुति तथा दि मोसन पिक्चर्सको सहकार्यमा निर्माण हुन लागेको हो ।
यो फिल्मको छायांकन सुजन प्रजापतिले गर्नेछन् भने सम्पादनको जिम्मेवारी सुरेन्द्र पौडेलले सम्हाल्नेछन् । फिल्मको पटकथा निरोज महर्जन र आकाश बरालले लेखेका छन् । संगीतको पक्षमा कालीप्रसाद बास्कोटा, एसीडी योगी, हर्क साउद, कल्याण सिंह, जयन वाइवा, र दीपक शर्माको रहनेछ ।
