काठमाडौं । हरर कमेडी सिनेमा ‘फिरफिरे फिरिरी’को ट्रेलर सार्वजनिक भएको छ । ट्रेलरमा समाजमा रहेको अन्धविश्वास, त्यसमा विश्वास गर्दाको प्रभाव, पैसा कमाउन गरिएको तिकडम, रहस्य, युवतिप्रतिको आकर्षण देखिन्छ ।
ट्रेलरमा सिनेमाका अधिकांश कलाकारलाई देख्न सकिन्छ ।
‘फिरफिरे फिरिरी’ कात्तिक २२ गते छठ पर्वको दिनबाट प्रदर्शनमा आउनेछ ।
चलचित्रलाई नवीन भट्टले निर्देशन गरेका छन् । उनको यो डेव्यु निर्देशन हो ।
सिनेमालाई मनोज कुमार अधिकारीले निर्माण गरेका हुन् । अधिकारीले यसअघि ‘नौ डाँडा पारी’ र ‘मंगलसुत्र’ निर्माणसँगै अभिनय पनि गरेका थिए ।
सिनेमाका सह–निर्माता नितिश पुन हुन् । पछिल्लो समय संसारभर हरर कमेडी सिनेमाले राम्रो दर्शकको साथ पाइरहेकाले नेपालमा पनि निर्माता अधिकारीले हरर कमेडी सिनेमा ‘फिरफिरे फिरिरी’ निर्माण गरेका हुन् ।
सिनेमामा सन्दीप श्रेष्ठ र नवीन भट्टको लेखन रहेको छ । यही सिनेमाबाट सन्दीप श्रेष्ठ र भावना उप्रेतीले नेपाली रजतपटमा डेब्यु गर्दैछन् । सिनेमामा मनोज कुमार अधिकारी, रबिना केसी, पुष्प अवस्थी, सूर्यमान लिम्बूलगायत कलाकारको पनि अभिनय रहेको छ ।
सिनेमामा जितु तामाङको छायांकन, रोशन दास, प्रकाश दाहाल र अग्नि सुबेदीको सहायक निर्देशन, केशव राज भट्टको कोरियोग्राफी, एलिस कार्कीको ब्याकराउण्ड म्युजिक, प्रशान्त सिवाकोटीको संगीत, अमित श्रेष्ठको साउण्ड डिजाइन, अनन्त घिमिरेको सम्पादन तथा कलर संयोजन रहेको छ ।
