डेनिला कार्कीले ‘मिसेज नेपाल वर्ल्ड २०२४’ को उपाधि जित्दै आगामी मिसेज वर्ल्डमा नेपालको प्रतिनिधित्व गर्ने अवसर प्राप्त गरेकी छन् ।
शनिबार साँझ नेपाल प्रज्ञा प्रतिष्ठान, काठमाडौंमा आयोजित प्रतियोगितामा प्रतियोगी नम्बर २१ का रूपमा प्रतिस्पर्धामा उत्रिएकी उनले उत्कृष्ट प्रदर्शन गर्दै यो प्रतिष्ठित उपाधि आफ्नो नाम गरेकी हुन् ।
विजेता कार्कीलाई माइती नेपालकी अध्यक्ष अनुराधा कोइराला र अभिनेत्री वसन्धुरा भुषालले पुरस्कार प्रदान गरे ।
रिबन इन्टरटेनमेन्टले आयोजना गरेको यस प्रतियोगितामा सुयाशा राउतले मिसेज नेपाल इन्टरनेशनलको उपाधि जितेकी छन्, जसले सिंगापुरमा हुने मिसेज इन्टरनेशनलमा नेपालको प्रतिनिधित्व गर्नेछिन् । त्यस्तै, प्रतियोगी नम्बर २६ की रेश्मा घिमिरेले मिस नेपाल इन्टरनेशनलको उपाधि जित्दै मिस इन्टरनेशनल मञ्चमा नेपाललाई प्रतिनिधित्व गर्नेछिन् ।
अन्य प्रतियोगीहरूमध्ये प्रतियोगी नम्बर १३, अलिना घिमिरेलाई फर्स्ट रनर-अप, किरण कार्की (प्रतियोगी नम्बर १९) सेकेन्ड रनर-अप, र अनु कार्की (प्रतियोगी नम्बर ४) लाई थर्ड रनर-अप घोषित गरियो ।
नेपाली विवाहित महिलाहरूको सुन्दरता, आत्मविश्वास, र प्रतिभालाई सम्मान गर्दै आयोजना गरिएको यस प्रतियोगितामा प्रमुख निर्णायकको रूपमा सिएनएन हिरो अनुराधा कोइराला, अन्य निर्णायकमा कलाकार केदार घिमिरे र पत्रकार अखण्ड भण्डारीले भूमिका निर्वाह गरेका थिए । प्रतियोगिता अश्विनीकान्त झाको कोरियोग्राफीमा सम्पन्न भएको हो ।
रिबन इन्टरटेनमेन्टका प्रमुख निशुकान्त झाका अनुसार प्रतियोगिताको उद्देश्य नेपाली महिलाहरूलाई राष्ट्रिय तथा अन्तर्राष्ट्रिय स्तरमा उचाइ दिने बताइएको छ ।
