देशकै ठूलो मल्टिप्लेक्स चेन क्यूएफएक्सले नेपाली सिनेमा ‘पूर्ण बहादुरको सारङ्गी’लाई ‘सुपरहिट’को मान्यता दिएको छ । १५ कात्तिकबाट प्रदर्शनमा आएको यो चलचित्रले उच्च अकुपेन्सी कायम गर्दै सफल व्यापार गरिरहेको छ, जसको आधारमा क्यूएफएक्सले यसलाई सुपरहिट घोषणा गरेको हो ।
चलचित्र उद्योगमा चर्चामा रहेको ‘पूर्ण बहादुरको सारङ्गी’लाई क्यूएफएक्सले सुपरहिट घोषणा गर्दा यसको सफलता अझ सशक्त भएको छ । क्यूएफएक्स सिनेमा चेनले आम्दानी र अकुपेन्सीलाई आधार मानेर ‘सुपरहिट’ र ‘ब्लकबस्टर’को घोषणा गर्दै आएको छ ।
सरोज पौडेलको निर्देशनमा बनेको यस सिनेमामा विजय बराल, प्रकाश सपुत, मुकुन भुसाल, र अञ्जना बराइलीलगायतका कलाकारको मुख्य भूमिका रहेको छ ।
चलचित्रमा महेश दवाडीको संवादले कथा जीवन्त बनाएको छ भने निर्माता विनोद पौडेल र प्याट्रिक सुवेदीले सिनेमा निर्माण गरेका हुन् । कार्यकारी निर्मातामा रमेश चौलागाईं, हरि श्रेष्ठ, र रमेश ढकाल रहेका छन् ।
‘पूर्ण बहादुरको सारङ्गी’को सुपरहिट घोषणासँगै नेपाली चलचित्र उद्योगमा यसले नयाँ सफलता हासिल गरेको छ ।
