चलचित्र ‘ह्रस्व दीर्घ’ले घरेलु बक्स अफिसमा सुखद कमाइ गरेको छ ।
मुलकका डेढसय हलबाट रिलिज भएको यो चलचित्रले प्रदर्शनको दोस्रो दिन शनिबारसम्म देशब्यापी २ करोड माथि ग्रसकलेक्सन गरेको वितरण कम्पनी ब्यांकटेस इन्टरटेनमेन्टले जनाएको छ ।
चलचित्रले शुक्रबार देशब्यापी ८० लाख ग्रस र शनिबार १ करोड २० लाख रुपैयाँ ग्रस कमाइ गरेको वितरक मनोज राठीले जानकारी दिए । उनका अनुसार फिल्मले आइतबार पनि उत्साहजनक कलेक्सन गरेको छ ।
‘ह्रस्व दीर्घ’ले दर्शकीय प्रतिक्रिया राम्रो पाएको देखिन्छ । कथावस्तु, ट्विस्ट एन्ड टर्न, कलाकारहरुको अभिनय, द्वन्द्व, मेकिङ पक्षलाई रुचाइएको छ ।
यता, चलचित्रप्रति दर्शकलाई थप आकर्षित गर्न निर्माण टिमले मुख्य कलाकार प्रदीप रावत (गजनी भिलेन)लाई काठमाडौं बोलाएको छ । कयौं साउथ र बलिउड सिनेमामा काम गरिसकेका उनी श्रीमती कल्याणीसहित आइतबार दिउँसो काठमाडौं ओलिँएका छन् ।
रावत चारदिन नेपाल रहने र त्यो समयमा हल-हलमा पुगेर दर्शकसँग भेट गर्ने कार्यक्रम रहेको जानकारी प्राप्त छ । कलाकार रावत ‘ह्रस्व दीर्घ’मा नीताको बुबाको भूमिकामा छन् ।
नीता फिल्मस्को प्रस्तुतिमा निर्माण भएको सिनेमाका कार्यकारी निर्माता धनन्जय गलानी हुन् । सिनेमामा हरिहर अधिकारी, नीता ढुंगाना, ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसीलगायतका कलाकारको अभिनय रहेको छ ।
अभिनेता हरिहर अधिकारीको कथा र प्रतीक पौडेल, निर्देशक पन्त र हरिहरको पटकथा तथा संवाद रहेको सिनेमालाई बलिउडका चर्चित सिनेमाटोग्राफर कवीरलालले खिचेका हुन् ।
सिनेमालाई चन्द्र पन्तले निर्देशन गरेका हुन् । यसअघि केही भोजपुरी सिनेमाको निर्देशन तथा करिब पाँच दर्जनभन्दा बढी नेपाली सिनेमामा द्धन्द्व निर्देशकको रुपमा काम गरिसकेका पन्तको यो निर्देशकीय डेव्यु नेपाली सिनेमा हो ।
