नेपाली चलचित्र उद्योगमा सर्वाधिक कमाइको रेकर्ड बनाउन र सर्वाधिक चर्चा कमाउन सफल चलचित्र ‘पूर्ण बहादुरको सारङ्गी’ सोमबारदेखि देशभरका सिनेमा हलहरूमा प्रदर्शन नहुने भएको छ । निर्माता कम्पनी सेभेन सिस सिनेमाले एक प्रेस विज्ञप्ति जारीगर्दै यो जानकारी दिएको हो ।
चलचित्र निर्माण टोलीले दर्शकहरूबाट प्राप्त माया र समर्थनका लागि आभार व्यक्त गर्दै चलचित्रको प्रदर्शन रोक्नुपरेकोमा दुःख व्यक्त गरेको छ । विज्ञप्तिमा भनिएको छ, “पछिल्लो समय केही सिनेमा हलहरूले चलचित्रलाई नजरअन्दाज गरेको व्यवहारका कारण यो निर्णय गर्न बाध्य भएका हौँ ।”
चलचित्र पूर्ण बहादुरको सारङ्गी नेपाली चलचित्र उद्योगमा नयाँ सफलता र रेकर्ड बनाउने क्रममा रहेको थियो । तर, केही चुनौतिहरू र अवरोधका कारण आगामी सोमबार मंसिर २४ गतेबाट प्रदर्शन बन्द गरिने सेभेन सिस सिनेमाले स्पष्ट पारेको छ ।
प्रदर्शन रोकिनु परेकोमा गहिरो क्षमायाचना गर्दै निर्माण टोलीले भविष्यमा दर्शकको अपेक्षालाई ध्यानमा राख्दै नयाँ सिनेमासहित पुनः हलमा फर्किने वाचा गरेको छ । विज्ञप्तिमा भनिएको छ, “हामीले आगामी प्रोजेक्टहरूमा दर्शकलाई उच्चस्तरीय मनोरञ्जन प्रदान गर्न अझै मेहनत गर्नेछौँ ।”
यस्तो भनिएको छ जारी विज्ञप्तिमा
चलचित्र पूर्ण बहादुरको सारङ्गीलाई सिनेमा घरहरुले देखाउनु भएको माया र साथका लागि हामी आभारी छौं। तपाईहरूको मायाका कै कारण हाम्रो चलचित्रले नेपाली चलचित्र उद्योगमा इतिहास रच्न सफल भयो ।
यो सहयोगका लागि धन्यबाद भन्दै हामी आगामी दिनमा पनि दर्शकलाई निराश नबनाउने वाचा गछौं । यहाँहरूको साथको अपेक्षा पनि गछौं। तर, अहिले भने हामी कात्तिक १५, १६ र १७ गते जुन अबस्थामा थियौं, ठिक त्यही अवस्थामा आइपुगेका छौं। पूर्ण बहादुरको सारङ्गीलाई कर्नरिङ गरेपछि विद्रोह गर्ने अवस्थामा पुग्न वाध्य भएका छौं ।
विशेष गरी पछिल्लो समयावधिमा देखिएका चुनौतीहरू र हाम्रो चलचित्रलाई केही सिनेमा घरहरुबाट गरिदै आएको गरिएको नजरअन्दाज व्यवहारले यस निर्णयलाई अपरिहार्य बनाएको हो ।
यस २०८१ मंसिर २४ सोमबार गते देखि देशभरका सिनेमा घरहरूमा पूर्ण बहादुरको सारही अब प्रदर्शनमा आउने छैन । यो परिस्थितिले दर्शकलाई पर्न सक्ने अविधाका लागि हामी गहिरो क्षमायाचना व्यक्त गर्दछौ ।
अर्को सिनेमा मार्फत हलमा पुनः भेट्ने बाचा गछौं । जहाँ हामी यो पटकजस्तै दर्शकलाई निराश बनाउने छैनौं ।
आगामी दिनमा हामी नयाँ सिनेमाको साथ तपाईंहरूसँग पुनः भेट गर्ने वाचा गर्दछौं । अर्कोपटक हामी तपाईंहरूको अपेक्षालाई सम्मान गर्दै उच्चस्तरीय मनोरञ्जन प्रदान गर्ने प्रतिबद्धता व्यक्त गर्दछौं। साथै, भविष्यमा कुनै पनि पक्षबाट नजरअन्दाज महसुस गर्नुपर्ने अवस्थाबाट टाढा रहन सकियोस् भन्ने हाम्रो कामना छ।
भारतीय चलचित्र पुष्पा २ आएपछी पूर्ण बहादुरको सारङ्गीको शो हवात्तै घटाइएको थियो। विजय बराल अभिनीत यो चलचित्रले नेपालमा ४७ करोड बढी व्यापार गरिसकेको छ । ‘पुष्पा २’ नआएको भए फिल्मले ५० करोडको ‘माइलस्टोन’ हासिल गर्ने निश्चित थियो । यद्यपि, ‘सारङ्गी’ले सर्वाधिक कमाउने नेपाली चलचित्रको इतिहास रचिसकेको छ ।
